Tamannaah தளபதி 65 ஹீரோயின் இவர் தான்? 10 வருடம் கழித்து விஜய்க்கு ஜோடியாகும் நடிகை

மாஸ்டர் படம் ரிலீசுக்கு தயாராக இருக்கும் நிலையில் அது எப்போது வெளிவரும் என ரசிகர்கள் காத்திருப்பது ஒருபுறமிருக்க, விஜய்யின் அடுத்த படமான தளபதி 65 பற்றிய தகவல்களும் தொடர்ந்து தமிழ் சினிமா ரசிகர்கள் மத்தியில் பெரிய எதிர்பார்ப்பை ஏற்படுத்தி வருகிறது. ஏ. ஆர். முருகதாஸ் இயக்க உள்ள அந்த படத்தைப் பற்றி பல தகவல்கள் சமீபகாலமாக வெளியாகிக் கொண்டிருக்கிறது. சன் பிக்சர்ஸ் நிறுவனம் மிக பிரமாண்ட பட்ஜெட்டில் எடுக்க உள்ள இந்த படத்தினை பற்றிய பல்வேறு தகவல்கள் தொடர்ந்து வெளிவந்து கொண்டிருக்கின்றன. இருப்பினும் இந்த படம் பற்றிய அதிகாரப்பூர்வ அறிவிப்பு எதுவும் தற்போது வரை வெளிவராமல் இருக்கிறது.

இந்த படத்தின் இசையமைப்பாளராக எஸ் தமன் பணியாற்ற உள்ளார் என்பது மட்டுமே தற்போது வரை அதிகாரப்பூர்வமாக உறுதியாகி இருக்கும் தகவல். மற்ற நடிகர் நடிகைகள் மற்றும் படக்குழுவினர் பற்றி எந்த தகவலும் வெளி வராமல் இருக்கிறது. இந்நிலையில் தற்போது கோலிவுட் வட்டாரத்தில் வேகமாக பரவி வரும் தகவல் என்னவென்றால் தளபதி 65 படத்தின் ஹீரோயினாக தமன்னா நடிக்க உள்ளார் என்பது தான்.

தமன்னா இதற்கு முன்பு தளபதி உடன் சுறா படத்தில் ஜோடி சேர்ந்து நடித்திருக்கிறார். அது விஜய்யின் ஐம்பதாவது படம் என்பது குறிபிடத்தக்கது. அந்த படம் எதிர்பார்த்த அளவு வரவேற்பு பெறவில்லை என்றாலும் படத்தில் வரும் பாடல்களில் தமன்னா மற்றும் விஜய்யின் நடனம் பெரிய அளவில் அனைவரையும் ஈர்த்தது குறிப்பிடத்தக்கது. இந்த நிலையில் தான் தளபதி 65 படத்திற்காக சன் பிக்சர்ஸ் நிறுவனம் அவருடன் பேச்சு வார்த்தையில் இருப்பதாக கூறப்படுகிறது. சுறா உட்பட தமன்னா நடித்த 5 படங்களை சன் பிக்சர்ஸ் வெளியிட்டிருக்கிறது என்பது குறிப்பிடத்தக்கது.

அனைத்தும் உறுதியான பிறகு அதிகாரப்பூர்வ அறிவிப்பு வெளிவரலாம் என எதிர்பார்க்கப்படுகிறது. தளபதி 65 படத்தின் மூலமாக விஜய் மற்றும் ஏ ஆர் முருகதாஸ் இணைவது இது நான்காவது முறை. இதற்கு முன்பு துப்பாக்கி, கத்தி, சர்க்கார் ஆகிய படங்களில் அவர்கள் இணைந்து பணியாற்றி இருக்கிறார்கள். அனைத்து படங்களும் நல்ல வரவேற்பைப் பெற்றிருக்கின்றன. அதனால் தளபதி 65 படத்திற்கும் எதிர்பார்ப்பு கூடி இருப்பதில் ஆச்சர்யமில்லை.

மேலும் இந்த படம் துப்பாக்கி இரண்டாம் பாகமாக இருக்க வாய்ப்பு இருக்கிறது என சமீபத்தில் தகவல் பரவிய நிலையில் இயக்குனர் முருகதாஸ் அதை மறுத்திருக்கிறார்.

"எந்த படத்தின் sequelம் எடுக்கவில்லை. கொஞ்சம் ஓப்பனாக இருந்தால் நன்றாக இருக்கும் என்பது தான் பொதுவாக என்னுடைய கருத்து. ஒரு sequel படம் எடுப்பது மீண்டும் நம்மை நாமே ஒரு வட்டத்துக்குள் போட்டு அடைப்பது போலத் தான். அதை தாண்டி எதாவது யோசிக்க வேண்டும் என்று தான் நான் நினைப்பேன். மேலும் சில இணையதளங்களில் (துப்பாக்கி தயாரிப்பாளர்) டைட்டில் கொடுக்கவிலை, அதனால் பிரச்சனை என சொல்வதெல்லாம் பொய், எதுவும் உண்மை கிடையாது. நான் பொதுவாக சொல்கிறேன். படம் எப்படி இருக்கும் என்பது பற்றி முறையான ஒரு அறிவிப்பு வெளிவந்தால் தான் சரியாக இருக்கும்" என அவர் கூறி இருந்தது குறிப்பிடத்தக்கது.