கொரோனாவால் பாதிக்கப்பட்ட என் அம்மாவுக்கு பெட் கிடைக்கல: சிம்பு பட நடிகை குமுறல்

கொரோனாவின் இரண்டாம் அலை சுனாமியாக மாறி இந்தியர்களை வாரிச் சுருட்டிக் கொண்டிருக்கிறது. கொரோனாவால் பாதிக்கப்படும் பலருக்கு ஏற்படும் முதல் பிரச்சனையே மருத்துவமனைகளில் பெட் கிடைக்காமல் இருப்பது தான். பெட் கிடைத்தாலும் ஆக்சிஜன் சிலிண்டர் கிடைப்பது இல்லை. மேலும் ரெம்டெசிவிர் மருந்துக்கும் தட்டுப்பாடாக உள்ளது. யாராவது பெட், ஆக்சிஜன் சிலிண்டர், ரெம்டெசிவிருக்கு ஏற்பாடு செய்ய முடியுமா என பிரபலங்கள் முதல் சாதாரண மக்கள் வரை பலரும் சமூக வலைதளங்களில் கேட்டுக் கொண்டிருக்கிறார்கள்.

சிம்புவின் வானம் படம் மூலம் நடிகையானவர் ஜாஸ்மின் பசின். சித்தார்த்தின் ஜில் ஜங் ஜக் படத்திலும் நடித்திருக்கிறார். தமிழ் தவிர்த்து தெலுங்கு, மலையாள படங்களிலும் நடித்துள்ளார். தற்போது இந்தி தொலைக்காட்சி தொடர்களில் கவனம் செலுத்தி வருகிறார். ஜாஸ்மினின் அம்மாவுக்கு கொரோனா வைரஸ் பாதிப்பு ஏற்பட்டுள்ளது. அவருக்கு மருத்துவமனையில் பெட் கிடைக்காமல் அல்லாடியிருக்கிறார்கள். இது குறித்து ஜாஸ்மின் போட்ட ட்வீட்டை பார்த்தவர்கள் பிரபல நடிகையின் அம்மாவுக்கே இந்த கதியா என வியந்திருக்கிறார்கள்.

அதிருப்தி அடைந்தேன். மனமுடைந்துவிட்டேன். தினமும் மரணங்கள். மக்கள் பெட், ஆக்சிஜன் சிலிண்டர் கிடைக்காமல் சாலையோரம் கிடக்கிறார்கள். கடந்த இரண்டு நாட்களுக்கு முன்பு என் அம்மாவுக்கும் அந்த கதி ஏற்பட்டது. ஒரு பெட் கிடைப்பது பெரிய விஷயமாக இருந்தது. என் வயதான தந்தையோ, அம்மாவுக்கு சிகிச்சை கிடைக்க வைக்க அங்கும், இங்குமாக ஓடிக் கொண்டிருந்தார். பலருக்கும் இதே நிலை தான் என ஜாஸ்மின் ட்வீட் செய்துள்ளார்.

மக்கள் தங்கள் அன்புக்குரியவர்கள், குடும்பத்தாரை இழந்து கொண்டிருக்கிறார்கள். இதற்கு எல்லாம் யாரை குறை சொல்வது? நம் சிஸ்டம் தோல்வி அடைந்துவிட்டதா என கேள்வி எழுப்பியுள்ளார் ஜாஸ்மின். அவரின் ட்வீட்டுகளை பார்த்தவர்களோ, மேடம் உங்கள் அம்மாவுக்கே இப்படி என்றால் சாதாரண மக்கள் நிலையை பற்றி சொல்லவா வேண்டும். மக்கள் கொரோனாவால் இறக்கவில்லை, சிகிச்சை கிடைக்காமல் இறந்து கொண்டிருக்கிறார்கள் என தெரிவித்துள்ளனர்.