கேஸ் போட தீபாவுக்கு எந்த தகுதியும் கிடையாது: கவுதம் மேனன் பொளேர்

மறைந்த முன்னாள் முதல்வர் ஜெயலலிதாவின் வாழ்க்கை வரலாற்றை கவுதம் மேனன் குயின் என்கிற பெயரில் வெப் தொடராக எடுத்துள்ளார். இயக்குநர் ஏ. எல். விஜய் தலைவி என்கிற பெயரில் படமாக எடுத்துக் கொண்டிருக்கிறார். தன்னிடம் அனுமதி பெறாமல் எடுக்கப்படும் குயின், தலைவி உள்ளிட்டவைக்கு தடை விதிக்க வேண்டும் என்று கூறி ஜெயலலிதாவின் அண்ணன் மகள் ஜெ. தீபா சென்னை உயர் நீதிமன்றத்தில் வழக்கு தொடர்ந்தார். அந்த வழக்கை நீதிமன்றம் தள்ளுபடி செய்தது. இதையடுத்து தீபா மேல்முறையீடு செய்தார்.

தீபாவின் மேல்முறையீட்டு மனுவை விசாரித்த நீதிமன்றம் இது குறித்து விளக்கம் அளிக்குமாறு இயக்குநர்கள் கவுதம் மேனன், விஜய் உள்ளிட்டோருக்கு உத்தரவிட்டது. அந்த வழக்கு இன்று விசாரணைக்கு வந்தபோது கவுதம் மேனன் சார்பில் பதில் மனு சமர்பிக்கப்பட்டது. வழக்கு தொடர தீபாவுக்கு எந்த தகுதியும் இல்லை என்று அந்த மனுவில் கவுதம் குறிப்பிட்டுள்ளார்.

தீபா உள்நோக்கத்துடன் இந்த வழக்கை தொடர்ந்துள்ளார். ஜெயலலிதாவின் நெருங்கிய உறவினர் என்று கூறுகிறார் தீபா. ஆனால் பலமுறை ஜெயலலிதாவை தொடர்புகொள்ள முடியவில்லை என்று அவரே கூறியிருக்கிறார். குயின் தொடர் உண்மை சம்பவங்களின் அடிப்படையில் எடுக்கப்பட்டுள்ளது. அனிதா சிவகுமார் எழுதிய தி குயின் புத்தக்கத்தின் அடிப்படையில் இந்த தொடர் எடுக்கப்பட்டிருக்கிறது. அதனால் தீபாவின் மனுவை தள்ளுபடி செய்ய வேண்டும் என்று கவுதம் மேனன் தரப்பில் கேட்டுக் கொள்ளப்பட்டுள்ளது.

தீபாவின் மனுவுக்கு பதில் அளிக்க விஜய் உள்ளிட்டோர் கால அவகாசம் கேட்டுள்ளார்கள். இதையடுத்து இந்த வழக்கை மார்ச் மாதம் 6ம் தேதிக்கு ஒத்தி வைத்துள்ளது நீதிமன்றம். தலைவி படப்பிடிப்பு சென்னையில் விறுவிறுப்பாக நடந்து வருகிறது. ஜெயலலிதாவின் பிறந்தநாளை முன்னிட்டு கடந்த 24ம் தேதி தலைவி படத்தின் செகண்ட் லுக் போஸ்டர் வெளியானது என்பது குறிப்பிடத்தக்கது.