அட்லீயுடன் அடுத்த படமா? ஜெயம் ரவி கொடுத்த விளக்கம்

நடிகர் ஜெயம் ரவி தமிழ் சினிமாவில் முன்னணி ஹீரோக்களில் ஒருவர். எப்போதும் வித்தியாசமான கதைகளை தேர்ந்தெடுத்து நடித்து வரும் அவருக்கு தமிழ் சினிமாவில் எக்கச்சக்க ரசிகர்கள் இருக்கிறார்கள்.

தற்போது அவர் பூமி என்ற படத்தின் ரிலீசுக்காக காத்திருக்கிறார். லக்ஷ்மன் இயக்கியுள்ள இந்த படம் ஜெயம் ரவியின் 25 வது படமாக உருவாகியுள்ளது. இதில் விவசாயியாக ஜெயம் ரவி நடித்துள்ளார். தெலுங்கு நடிகை நிதி அகர்வால் ஜெயம் ரவிக்கு ஜோடி அந்த படத்தில் நடித்துள்ளார்.

பூமி படத்தை தொடர்ந்து தற்போது கைவசம் மணிரத்தினத்தின் பொன்னியின் செல்வன் மற்றும் ஜனகனமன ஆகிய இரண்டு படங்களை வைத்திருக்கிறார் ஜெயம் ரவி. இந்த இரண்டு படங்களின் பணிகளும் கொரோனா லாக் டவுன் காரணமாக நிறுத்தப்பட்டு உள்ளன என்பது குறிப்பிடத்தக்கது.

மேலும் ஜெயம் ரவி மற்றும் மோகன் ராஜா கூட்டணியில் தனி ஒருவன் இரண்டாம் பாகம் பற்றிய அறிவிப்பு சென்ற வருடமே வெளியிடப்பட்டது. ஜெயம் ரவி மற்றும் அரவிந்த்சாமி நடித்த தனி ஒருவன் மிகப்பெரிய ஹிட் என்பதால் இரண்டாம் பாகம் மிகப் பெரிய எதிர்பார்ப்பில் உள்ளது. அதற்கான கதையையும் மோகன் ராஜா தயார் செய்து முடித்து விட்டார். அந்த படம் ஷூட்டிங் இன்னும் தொடங்கப் படாமல் உள்ளது ரசிகர்களுக்கு வருத்தத்தை ஏற்படுத்தி இருந்தது. இந்நிலையில் தனி ஒருவன் இரண்டாம் பாகம் ஷுட்டிங் தற்போது தான் நடித்து வரும் படங்களை முடித்த பிறகு தான் துவங்க வாய்ப்பு இருக்கிறது என ஜெயம் ரவி தெரிவித்துள்ளார்.

மேலும் சில தினங்களுக்கு முன்பு ஜெயம் ரவி இயக்குனர் அட்லி உடன் அடுத்து கூட்டணி சேர உள்ளார் என தகவல் பரவியது. பிகில் படத்திற்கு பிறகு எந்த புதிய படம் பற்றிய அறிவிப்பையும் வெளியிடாமல் இருக்கும் அட்லி ஜெயம் ரவியின் அடுத்த படத்தை தயாரிக்க உள்ளார் என கூறப்பட்டது. இந்த படத்தினை அட்லீக்கு உதவியாளராக இருந்த ஒருவர் தான் இயக்கவுள்ளார் என்றும் கூறப்பட்டது.

ஆனால் இந்த படத்தை தான் இன்னும் உறுதி செய்யவில்லை என்று கூறியுள்ள ஜெயம் ரவி தான் முழு கதையையும் கேட்ட பிறகு விரைவில் முடிவு எடுப்பேன் என தெரிவித்துள்ளார். இதன் மூலமாக ஜெயம்ரவி தன்னை பற்றி பரவிய அந்த வதந்திகளுக்கு முற்றுப்புள்ளி வைத்துள்ளார்.