ஏன் கமல், இது உங்களுக்கே நியாயமா இருக்கா?

உலக நாயகன் கமல் ஹாஸன் தற்போது ஷங்கர் இயக்கத்தில் இந்தியன் 2 படத்தில் நடித்துக் கொண்டிருக்கிறார். இந்த படத்தில் காஜல் அகர்வால், சித்தார்த், ப்ரியா பவானி சங்கர் என்று ஒரு பெரிய நட்சத்திர பட்டாளமே இருக்கிறது.

சென்னையில் முதற்கட்ட படப்பிடிப்பை முடித்த ஷங்கர் அடுத்தக்கட்ட படப்பிடிப்பை ஆந்திராவில் நடத்த திட்டமிட்டுள்ளார். இந்த படத்திற்காக கமல் தனது உடல் எடையை குறைத்துள்ளார். பிக் பாஸ் 3 நிகழ்ச்சியில் கடந்த சனி மற்றும் ஞாயிற்றுக்கிழமையில் கமலை பார்த்த ரசிகர்கள் அசந்துவிட்டனர்.

அதிலும் குறிப்பாக ஞாயிற்றுக்கிழமை அவர் கேஸுவல் லுக்கில் ரொம்பவும் இளமையாக தெரிந்தார். அவரை பிக் பாஸ் மேடையில் பார்த்தபோது இந்த மனுஷனுக்கு வயசே ஆகாதா, நாளுக்கு நாள் இளமையாகிக் கொண்டே போகிறார், அவருக்கே இது நியாயமாக இருக்கிறதா என்று பலரும் தெரிவித்தனர்.

ஆரோக்கியம் மிகவும் முக்கியம் என்பதை கமல் நன்றாக புரிந்து வைத்துள்ளார். தினமும் உடற்பயிற்சி, யோகா செய்து உடலை கட்டுக்கோப்பாக வைத்துள்ளார். அதனால் தான் 64 வயதிலும் மனிதர் வாலிபர் போன்று தெரிகிறார், உற்சாகமாக செயல்படுகிறார்.

கமலை பார்த்து அவரின் ரசிகர்கள் புகழ்வதை பார்த்த ரஜினி ரசிகர்களோ ஏன், எங்கள் தலைவர் கூடத் தான் ஃபிட்டாக உள்ளார் என்று பெருமையுடன் தெரிவித்துள்ளனர். ரஜினி ரசிகர்கள் கூறியது உண்மை தான். கமல் மட்டும் அல்ல ரஜினியும் உடலை கட்டுக்கோப்பாக வைத்துள்ளார். யோகாவின் மகிமை ரஜினிக்கும் நன்கு தெரியும்.

கோலிவுட்டின் இரு பெரும் ஜாம்பவான்களை பார்த்து இளைஞர்கள் தங்களின் ஆரோக்கியத்தில் கவனம் செலுத்த முயற்சித்தால் அதுவே அவர்களுக்கு பெரும் மகிழ்ச்சியை அளிக்கும். காசு, பணம் சம்பாதித்தால் மட்டும் போதாது ஆரோக்கியத்தின் மீதும் கவனம் செலுத்த வேண்டும் என்பது குறிப்பிடத்தக்கது.