Kamal Haasan:கமல் எப்படி இருக்கிறார், எப்போ டிஸ்சார்ஜ்?: மருத்துவமனை நிர்வாகம்

தன் வழிகாட்டியான பிரபல இயக்குநர் கே. விஸ்வநாத்தை சந்திக்க ஹைதராபாத் சென்றார் உலக நாயகன் கமல் ஹாசன். அங்கிருந்து சென்னை திரும்பிய அவர் தனக்கு அசவுகரியமாக இருப்பதாக தெரிவித்திருக்கிறார். மேலும் கமலுக்கு லோசான காய்ச்சல் இருந்திருக்கிறது. இதையடுத்து போரூரில் இருக்கும் ராமச்சந்திரா மருத்துவமனையில் நேற்று இரவு அனுமதிக்கப்பட்டார். இந்நிலையில் கமல் ஹாசன் குறித்து மருத்துவமனை நிர்வாகம் அறிவிப்பு வெளியிட்டுள்ளது.

கமல் ஹாசன் தற்போது நலமாக இருக்கிறார். விரைவில் வீடு திரும்புவார் என மருத்துவமனை நிர்வாகம் தெரிவித்துள்ளது. இதை கேட்ட பிறகே கமல் ஹாசனின் ரசிகர்களும், மக்கள் நீதி மய்யம் நிர்வாகிகளும் நிம்மதி அடைந்திருக்கிறார்கள். கமல் பெரும்பாலும் இன்று மாலையே வீடு திரும்புவார் என எதிர்பார்க்கப்படுகிறது. மருத்துவமனையில் இருக்கும் நேரத்தில் வழக்கமான பரிசோதனைகளும் செய்யப்படுகிறதாம்.

கமல் ஹாசனுக்கு உடல்நலம் பாதிக்கப்பட்டது குறித்து அறிந்ததுமே ரசிகர்கள் பலர் கோவில்களில் பிரார்த்தனை செய்துள்ளனர். ஆண்டவருக்கு கண் த்ரிஷ்டி அதனால் தான் திடீரென்று உடம்புக்கு முடியாமல் போய்விட்டது. வீடு திரும்பியதும் சுத்திப் போடுங்க ஆண்டவரே. ஊர் கண்ணெல்லாம் உங்கள் மீது தான் என தீவிர ரசிகர்கள் தெரிவித்துள்ளனர். அண்மையில் பிறந்தநாளை கொண்டாடிய கமலின் புகைப்படங்கள் வைரலானது. அதுவும் கண் த்ரிஷ்ட்டிக்கு காரணம் என ரசிகர்கள் மேலும் தெரிவித்துள்ளனர்.

பிக் பாஸ் நிகழ்ச்சியின் 6வது சீசனை தொகுத்து வழங்கி வருகிறார் கமல் ஹாசன். வார இறுதி நாட்களில் மட்டும் தான் பிக் பாஸ் வீட்டிற்கு வருவார். கமலை பார்க்கும் ஆசையில் வார இறுதி நாட்களுக்காக போட்டியாளர்கள் மட்டும் அல்லாமல் பார்வையாளர்களும் காத்துக் கொண்டிருப்பார்கள். மேலும் இந்த வாரம் கமல் என்ன உடை அணிவார் என்பதை பார்க்கவும் ஒரு கூட்டம் இருக்கிறது.

செய்தி வாசிப்பாளர்கள், சீரியல்களில் வரும் நடிகைகளின் உடைகளுக்கு இணையாக பிக் பாஸ் நிகழ்ச்சிக்கு கமல் ஹாசன் அணிந்து வரும் உடைகள் கவனிக்கப்படுகிறது. கமல் ஹாசன் தன் காஸ்ட்யூம் டிசைனரை பார்த்து பார்த்து தேர்வு செய்திருக்கிறார். கமலுக்கு எது பொருந்தும் என்பதை புரிந்து வைத்து அழகு, அழகான உடைகளை கொடுக்கிறார் டிசைனர் என சமூக வலைதளங்களில் பேசிக் கொள்கிறார்கள். இதற்கிடையே இந்த நீதிமன்ற டாஸ்க் கொடூர மொக்கையாக இருக்கு ஆண்டவரே. நீங்களே வந்து என்னவென்று கேளுங்கள் என பார்வையாளர்கள் தெரிவித்துள்ளனர்.