நண்பர் மகனுக்காக பாடிய கமல்ஹாசன்!

நண்பர் கார்த்திக் மகன் கவுதம் கார்த்திக்காக நடிகர் கமல்ஹாசன் பாடல் ஒன்றை பாடியுள்ளார்.

நடிகர் கவுதம் கார்த்திக் தற்போது நடித்து வரும் படம் ‘முத்துராமலிங்கம்’. இந்தப் படத்தில் பிரியா ஆனந்த் நாயகியாக நடிக்கிறார். முக்கிய வேடத்தில் நெப்போலியன் நடிக்கிறார். படத்தை ராஜதுரை இயக்கி வருகிறார்.

இப்படம்பற்றி ராஜதுரை கூறுகையில், அகத்திய முனிவர் கண்டுபிடித்த கலை சிலம்பாட்டம். தமிழர் பாரம்பரிய விளையாட்டுகளில் ஒன்று. கம்பு சண்டையையே சிலம்பாட்டம் என்கின்றனர். இப்போதும் தென்மாவட்டங்களில் இந்த கலை உயிர்பெற்றிருக்கிறது. இதுதான் படத்தில் பயன்படுத்தப்பட்டிருக்கிறது. மூக்கையதேவர் பாத்திரத்தில் நெப்போலியன் நடிக்க அவரது மகன் முத்துராமலிங்கமாக கவுதம் கார்த்திக் நடிக்கிறார். நெப்போலியன் மற்றும் போலீஸ் கதாபாத்திரம் ஏற்கும் வம்சியும் பயிற்சி பெற்றனர். முதன்முறையாக கிராமத்து பெண்ணாக நடித்துள்ளார் பிரியா ஆனந்த்.

படத்தின் கதையை கேட்டவுடன் இளையராஜா இசையமைக்க சம்மதித்ததுடன், ‘தெற்கத்திய சிங்கமடா முத்துராமலிங்கமடா’ என்ற பாடலை நடிகர் கமல்ஹாசனை வைத்துபாட வைத்தார். கமலும் தன் நண்பர் கார்த்தியின் மகனுக்காக பாடுவதை பெருமையாக நினைத்தார். பாடல்கள் அனைத்தையும் பஞ்சு அருணாசலம் மறைவதற்கு முன் எழுதி தந்திருக்கிறார். யு.கே.செந்தில்குமார் ஒளிப்பதிவு. டி.விஜயபிரகாஷ் தயாரிக்கிறார். பொள்ளாச்சி, நெல்லை, சென்னையில் படப்பிடிப்பு நடந்துள்ளது. படம் அடுத்த மாதம் வெளியாகவுள்ளது.