கிரேசி மோகன் குடும்பம் ஒரு அற்புதமான கூட்டுக்குடும்பம்: கமல் ஹாசன்!!

நடிகர், எழுத்தாளர் கிரேஷி மோகனின் தீடீர் மறைவு தமிழ் சினிமா உலகை துக்கத்தில் ஆழ்த்தியுள்ளது.

நடிகர் கமலஹாசனுடன் இணைந்து பல படங்களில் பணிபுரிந்தவர். கமலின் ஆஸ்தான நண்பராக விளங்கியவர். தன் நண்பர் கிரேஷி மோகன் குறித்து கமல் கொடுத்த அறிக்கையில் கூறியிருப்பதாவது..

நண்பர் கிரேசி மோகன் அவர்கள் மீது நான் பொறாமைப்படும் பலவற்றில் மிக முக்கியமான விஷயம் அவரது மழலை மாறாத மனசு. அது அனைவருக்கும் வாய்க்காது. பல நண்பர்கள் லௌகீகம் பழகிக்கிறேன் பேர்வழிஎன்று அந்த அற்புதமான குணத்தை இழந்திருக்கின்றனர்.

“கிரேசி”என்பது அவருக்குப் பொருந்தாத பட்டம். அவர் “நகைச்சுவை ஞானி”.

அவரது திறமைகளை அவர் குறைத்துக்கொண்டு மக்களுக்கு ஏற்ற வகையில் ஜனரஞ்சகமாகத் தன்னைக் காட்டிக்கொண்டார் என்பது தான் உண்மை.

கிரேஸி மோகன் மறைவு: கண்ணீர்விட்டு கதறி அழும் சினிமா பிரபலங்கள்!

RIP Crazy Mohan: கிரேஸி மோகன் வாழ்க்கை, சாதனைகள்- ஒரு பார்வை

Crazy Mohan Died: கமலின் ஆஸ்தான வசனகர்த்தா கிரேசி மோகன் காலமானார்!

பல்வேறு தருணங்களில் சாருஹாசன், சந்திரஹாசன், மோகன்ஹாசன் என்றும் வைத்துக்கொள்ளலாம் என்று பகிரங்கமாக தன் பாசத்தை வெளிக்காட்டியவர் .

அந்த நல்ல நட்பின் அடையாளமாக, இன்று அவரது சகோதரர் பாலாஜி அவர்களுடன் இணைந்து நண்பர் மோகன் அவர்களின் நெற்றியில் கைவைத்து பிரியாவிடை கொடுத்தோம்.

நட்பிற்கு முடிவு என்பது கிடையாது. ஆள் இருந்தால் தான் நட்பா என்ன?

மோகன் அவர்களின் நகைச்சுவை அவரது ரசிகர்கள் மூலம் வாழும், அந்த வாழ்விற்கு நானும் துணையிருப்பேன்.

அவரது குடும்பம் ஒரு அற்புதமான கூட்டுக்குடும்பம். அவர்களுக்கு என்ன ஆறுதல் சொன்னாலும் ஆறாது, போதாது.

இந்த இழப்பைத் தாங்கிக்கொள்ள அவர்கள் பழகிக்கொள்வதற்கு மனோதிடம் வாய்த்திட வேண்டுகிறேன்.

அன்புடன்,
கமல் ஹாசன்