Kamal மகிழ்ச்சிதான் ஆனால் சோகம் என்ன தெரியுமா? : கமல்ஹாசன் ட்வீட்

நடிகர் கமல் எழுதி, இயக்கி, நடித்த ஹேராம் படம் இந்தி மற்றும் தமிழ் மொழிகளில் வெளியானது. இந்த படம் மொழிகள் கடந்து பலரால் பாராட்டப்பட்டது. இதில் பயன்படுத்தப்பட்ட நுணுக்கங்களுக்காகவும், தொழில்நுட்பங்களுக்காகவும் இந்த படம் பெரிய அளவில் இன்றும் கொண்டாடப்படுகிறது. இந்திய அளவில் குறிப்பிட்டு சொல்லப்படவேண்டிய படங்களில் ஒன்றாக இது நிச்சயம் இருக்கும்.

ஹேராமின் 20 ஆண்டுகளை கொண்டாடும் விதமாக நடிகர் கமல்ஹாசன் தனது ட்விட்டர் கணக்கில் இதுகுறித்த ட்வீட் ஒன்றை எழுதியிருந்தார். அவர் அந்த ட்வீட்டில் கூறியிருந்ததாவது,


ஹேராம் வந்து 20 ஆண்டுகள் ஆகிவிட்டன. சரியான நேரத்தில் இந்த படத்தை உருவாக்கியதற்கு மகிழ்ச்சியடைகிறேன். ஆனால் சோகம் என்னவென்றால், எது நடந்துவிடக்கூடாது என அந்த படத்தில் எச்சரிக்கப்பட்டதோ அது நிஜமாகிக் கொண்டிருக்கிறது. இந்த நாட்டின் நல்லிணக்கத்திற்கு விடப்பட்டிருக்கும் சவால்களை நாம் கட்டாயம் வெற்றி கொள்ள வேண்டும். நாம் வெற்றி பெறுவோம். நாளை நமதே

இவ்வாறு ஆங்கிலம், இந்தி மற்றும் தமிழ் கலந்து ட்வீட்டியுள்ளார் கமல்ஹாசன்.

இந்த ட்வீட்டை பார்த்த கமல் ரசிகர்களும் சினிமா ரசிகர்களும் ஹேராம் படத்தை பாராட்டி வருகின்றனர்.

விருதுகள்

ஹேராம் படம் வெளியான போது அதை பாலிவுட் ரசிகர்கள் வெகுவாக வரவேற்றனர். கொண்டாடினர் என்றே சொல்லலாம். பல விருதுகளையும் வாங்கி குவித்தது ஹேராம் திரைப்படம். இது பற்றி ஒருவர் கமலின் ட்வீட்டில் தெரிவித்துள்ளார்.

47வது தேசிய விருது வழங்கும் விழாவில், சிறந்த துணை நடிகருக்கான விருதை அதுல் குல்கர்னியும், சிறந்த காஸ்ட்யூம் டிசைனருக்கான விருதை சரிகாவும், சிறந்த ஸ்பெஷல் எபஃக்ட்ஸ்க்கான விருதை மந்த்ராவும் பெற்றனர்.


46 வது ஃபிலிம்ஃபேர் விருதுகள் விழாவிலும், 48வது தென்னிந்திய ஃபிலிம்ஃபேர் விருதுகள் விழாவிலும் விருது வாங்கியது இந்த படம். சிறந்த நடிகருக்கான விருது கமல்ஹாசனுக்கும், சிறந்த துணை நடிகருக்கான விருது அதுல் குல்கர்ணிக்கும் கிடைத்தது.

பெங்கால் ஃபிலிம் ஜர்னலிஸ்ட் அசோசியேசன் விருது ஒன்றையும் வாங்கியது ஹேராம். இந்த வருடத்தின் சிறந்த படம் எனும் விருதை வாங்கினார் கமல்ஹாசன்.