கமல்-கெளதம் மேனன் மீண்டும் கூட்டணி: வேட்டையாடு விளையாடு 2 உருவாகிறதா?

சிம்பு நடிப்பில் விண்ணை தாண்டி வருவாயா 2 படம் எப்போது இயக்க போகிறார் என்பது பற்றித்தான் கெளதம் மேனனிடம் அனைவரும் கேள்வி கேட்டு வந்தனர். சமீபத்தில் அது பற்றி அவர் அளித்த பேட்டியில் 'சிம்பு ஓகே சொன்னால் உடனே விடிவி 2 துவங்கிவிடும்' என கூறியிருந்தார்.

மேலும் தற்போது அவர் இயக்கி வரும் துருவ நட்சத்திரம் படம் பற்றி பேசிய அவர் அந்த படத்தின் ஷூட்டிங் முழுமையாக முடிந்துவிட்டது என்றும், எடிட்டிங் பணிகள் தற்போது நடந்து வருகிறது என்றும் கூறியுள்ளார்.

இந்நிலையில் தற்போது கெளதம் மேனன் அடுத்து கமல் ஹாசனுடன் ஒரு படத்தில் இணையப் போவதாக செய்திகள் பரவி வருகிறது. சமீபத்தில் வெளியான ஜிப்ஸி படத்தினை கமல்ஹாசனுக்கு திரையிட்டு காட்டியுள்ளனர். அவர் படத்தை பார்த்து பாராட்டியுள்ளார்.

அப்போது இயக்குனர் கவுதம் மேனனும் உடன் இருந்தார். அந்த சமயத்தில் தான் கமலுடன் அவர் மீண்டும் இணைவது பற்றி பேசியுள்ளார். வேட்டையாடு விளையாடு 2 படத்திற்காகத் தான் அவர்கள் மீண்டும் இணையவுள்ளனர் என செய்திகள் பரவி வருகிறது. இது பற்றிய அதிகாரப்பூர்வ அறிவிப்பு விரைவில் வரும் என்றும் எதிர்பார்க்கப்படுகிறது.

ஏற்கனவே கமல் நடிப்பில் இந்தியன் 2 படத்தின் ஷூட்டிங் விபத்து காரணமாக நிறுத்தப்பட்டுள்ளது. அது மீண்டும் எப்போது துவங்கும் என்று உறுதியான தகவல் இல்லை.

மேலும் தேவர் மகன் 2 படத்தை 'தலைவன் இருக்கின்றான்' என்ற பெயரில் படமாக்கப் போவதாக அறிவித்துள்ளார் கமல். இந்தியன் 2 முடிந்த பிறகு தான் இந்த படத்தின் ஷூட்டிங் துவங்கும் என எதிர்பார்க்கப்படுகிறது.

அது மட்டுமின்றி கமல் அரசியலில் நுழைந்து கட்சி நடத்தி வருகிறார். அடுத்த வருடம் தமிழ்நாட்டில் சட்டமன்ற தேர்தல் நடைபெறவுள்ளது. அதற்காக கமல் சில மாதங்கள் சினிமாவில் இருந்து ஒதுங்கி தேர்தல் பிரச்சாரத்திற்கு செல்வார் என எதிர்பார்க்கப்படுகிறது.

இவ்வளவு பிசியாக இருக்கும் கமல் வேட்டையாடு விளையாடு 2 படத்திற்கு எப்போது நேரம் ஒதுக்குவார் என்பதை பொறுத்திருந்து தான் பார்க்க வேண்டும்.