அஜித் பட ஹீரோயினின் புது அவதாரம்

அஜித் நடித்த வரலாறு படத்தில் அவருக்கு ஜோடியாக நடித்திருந்தவர் கனிகா. அவர் அதற்கு பல வருடங்கள் முன்பே ஃபைவ் ஸ்டார் என்ற படத்தின் மூலமாக தமிழ் சினிமாவில் அறிமுகம் ஆகியிருந்தார். வரலாறு படத்தில் நடித்த பிறகு தமிழ் ரசிகர்கள் மத்தியில் அவரது புகழ் உச்சிக்கே சென்றது.

அதன்பிறகு தெலுங்கு, மலையாளம் என பல மொழி படங்களில் அவர் நடித்து வந்தார். சமீப காலமாக தமிழ் சினிமாவில் எந்த படத்திலும் நடிக்காத அவர் தற்போது விஜய் சேதுபதியின் 'யாதும் ஊரே யாவரும் கேளீர்' என்ற படத்தில் ஒரு முக்கிய ரோலில் நடித்து வருகிறார். இந்த படத்தில் மேகா ஆகாஷ் தான் ஹீரோயினாக நடிக்கிறார்.

இந்நிலையில் தற்போது கனிகா நடிப்பது மட்டுமின்றி இயக்குனராகவும் களமிறங்கியுள்ளார். தான் ஒரு குறும்படத்தை இயக்கிவருவதாக இன்ஸ்டாகிராமில் தெரிவித்துள்ளார் கனிகா.


"கேமராவுக்கு பின்னால் இருந்து முதல்முறையாக பணியாற்றுகிறேன். சினிமா ஒரு கடல் போன்றது என நான் எப்போதும் நினைப்பேன். நடிப்பு மட்டுமின்றி ஒரு கலைஞன் கற்றுக்கொள்ள பல்வேறு விஷயங்கள் இருக்கின்றன. புதிதாக எதையாவது கற்கவேண்டும் என எனக்குள் இருக்கும் உணர்வு என்னை முதல் முறையாக படம் இயக்க வைத்துள்ளது."

"என மனதிற்கு மிக நெருக்கமான ஒரு விஷயம் பற்றி குறும்படம் எடுத்துள்ளேன். ஷூட்டிங் முடிந்து இறுதி கட்ட பணிகள் நடந்து வருகிறது" என கனிகா தெரிவித்துள்ளார்.

இந்த குறும்படத்தின் தலைப்பு உள்ளிட்ட மற்ற விவரங்களை கனிகா இன்னும் வெளியிடவில்லை.