‘நடிகையர் திலகம்’ படத்தில் நடித்த கீர்த்திக்கு வாழ்த்து கூறிய கமல்ஹாசன்!!

‘நடிகையர் திலகம்’ படத்தில் சிறப்பான நடிப்பை வெளிப்படுத்திய நடிகை கீர்த்தி சுரேஷுக்கு, உலகநாயகன் கமல்ஹாசன் தனது வாழ்த்துகளைத் தெரிவித்துள்ளார்.

1950 மற்றும் 60களில், தமிழ் மற்றும் தெலுங்கில் முன்னணி நடிகையாக திகழ்ந்தவர் நடிகை சாவித்ரி. 300க்கும் மேற்பட்ட படங்களில் நடித்துள்ள சாவித்ரி, சொந்தமாக படம் தயாரித்து நஷ்டமடைந்து, சொத்துக்களை இழந்து 46 வயதில் மிகவும் பரிதாபமாக உயிரிழந்தார்.

இந்நிலையில், இவரின் வாழ்க்கை வரலாறு, தமிழில் ‘நடிகையர் திலகம்’ என்ற பெயரிலும் தெலுங்கில் ‘மகாநடி’ என்ற பெயரிலும் படமாக உருவாகி உள்ளது. இதில் சாவித்ரி கதாபாத்திரத்தில் நடிகை கீர்த்தி சுரேஷ் நடித்துள்ளார். அவருடன் துல்கர் சல்மான், சமந்தா, மற்றும் பிரகாஷ் ராஜ் உள்ளிட்டோரும் நடித்துள்ளனர்.

நேற்று தமிழில் வெளியான இப்படத்திற்கு, ரசிகர்கள் மத்தியில் நல்ல வரவேற்பு கிடைத்துள்ளது. இதுதவிர விமர்சகர்கள் மத்தியிலும், பிரபலங்கள் மத்தியிலும் நல்ல வரவேற்பு இந்தப் படத்திற்கு கிடைத்துள்ளது.

இதையடுத்து நடிகர் கமல்ஹாசன், நடிகையர் திலகம் படத்தில் நடித்த கீர்த்தி சுரேஷுக்கு தனது வாழ்த்துகளைத் தெரிவித்துள்ளார். இதுகுறித்து, கீர்த்தி சுரேஷ் தனது ட்விட்டர் பக்கத்தில் வெளியிட்டுள்ள பதிவில், “நடிகையர் திலகம் பட வெளியீட்டின்போது, கமல்ஹாசன் அவர்களின் ஆசீர்வாதத்தைப் பெற்றது, மகிழ்ச்சியாக உள்ளது” என தெரிவித்துள்ளார்.

இது தவிர, படத்தில் சிறப்பான நடிப்பை வெளிப்படுத்திய கீர்த்தி சுரேஷுக்கு பிரபலங்கள் பலரும் தங்கள் பாராட்டுகளையும், படம் வெற்றி பெற வாழ்த்துகளையும் தெரிவித்துள்ளனர்.