அஜித்துக்காக வலிமை டைட்டிலை விட்டுக்கொடுத்த பிரபலம்!

நேர்கொண்ட பார்வை படத்தின் வெற்றியைத் தொடர்ந்து அஜித், தல 60 படத்தில் நடிக்க இருக்கிறார். இப்படத்திற்கு அண்மையில் பூஜை போடப்பட்டு டைட்டில் அறிவிக்கப்பட்டது. அதன்படி, தல60 படத்திற்கு வலிமை என்று டைட்டில் வைக்கப்பட்டது. இந்த நிலையில், இந்த டைட்டில் எப்படி வந்தது என்பது குறித்து புதிய தகவல் வந்துள்ளது.

கெனன்யா பிலிம்ஸ் நிறுவனத்தின் உரிமையாளர் செல்வகுமார், வலிமை படத்தின் உரிமையை வைத்துள்ளார். இதையடுத்து, இப்படத்தின் டைட்டிலுக்கு அனுமதிகோரி படக்குழுவினர் செல்வகுமாருக்கு கடிதம் எழுதியுள்ளனர். அவரும் அஜித்துக்காகவே வலிமை படத்தின் டைட்டிலை விட்டுக்கொடுத்துள்ளார் என்பது குறிப்பிடத்தக்கது.

இயக்குநர் ஹெச் வினோத், தயாரிப்பாளர் போனி கபூர் கூட்டணியில், இந்தப் படம் உருவாகிறது. போலீஸ் கதையை மையப்படுத்திய இப்படத்தில் அஜித் போலீஸ் அதிகாரியாக நடிக்கிறார். இவரது மகளாக அனிகா நடிக்கிறார். இப்படத்திற்கு யுவன் சங்கர் ராஜா இசையமைக்கிறார். நிரவ் ஷா ஒளிப்பதிவு செய்கிறார். இப்படத்தின் படப்பிடிப்பு வரும் டிசம்பர் மாதம் தொடங்க இருக்கிறது. வரும் 2020 ஆம் ஆண்டின் இரண்டாம் பகுதியில் இப்படம் வெளியாக இருப்பதாக தெரிவிக்கப்பட்டுள்ளது.

இதுவரை இப்படத்தில், நயன் தாரா, கீர்த்தி சுரேஷ், த்ரிஷா ஆகியோரில் யாரேனும் ஒருவர் அஜித்துக்கு ஜோடியாக நடிப்பார் என்று கூறப்பட்டு வந்த நிலையில், தற்போது நஸ்ரியா நடிக்க இருப்பதாக தகவல் வெளியாகி வருகிறது. இது குறித்து அதிகாரப்பூர்வ அறிவிப்பு விரைவில் வரும் என்று எதிர்பார்க்கப்படுகிறது.