நயன்தாராவின் நெற்றிக்கண் படத்தில் இணைந்த கோ பட நடிகர்

தர்பார் படத்திற்கு பிறகு கைவசம் நான்கு படங்கள் வைத்திருக்கிறார் நயன்தாரா. அதில் இரண்டு படங்களில் விக்னேஷ் சிவன் உடன் அவர் பணியாற்றுகிறார்.

விக்னேஷ் சிவன் தயாரிப்பில் நெற்றிக்கண் படத்தில் நடிக்கிறார் அவர். அடுத்து விக்னேஷ் சிவன் இயக்கத்தில் காத்துவாக்குல ரெண்டு காதல் என்ற படமும் அறிவிக்கப்பட்டுள்ளது. அதன் ஷூட்டிங் விரைவில் துவங்கும் என எதிர்பார்க்கப்படுகிறது. மேலும் RJ பாலாஜி இயக்கத்தில் மூக்குத்தி அம்மன் படத்தின் ஷூட்டிங்கை சமீபத்தில் தான் நிறைவு செய்தார் நயன்தாரா என்பது குறிப்பிடத்தக்கது.

அது மட்டுமின்றி நயன்தாரா ரஜினிகாந்தின் அண்ணாத்த படத்திலும் நடித்து வருகிறார். இருப்பினும் அந்த படத்தில் நயன்தாராவை விட ரஜினிக்கு தங்கையாக நடிக்கும் கீர்த்தி சுரேஷ் கதாபாத்திரத்திற்கு அதிக முக்கியத்துவம் இருக்கும் என கூறப்பட்டு வருகிறது.

இந்நிலையில் நெற்றிக்கண் படம் பற்றி ஒரு புதிய தகவல் வெளியாகியுள்ளது. கோ படத்தில் வில்லனாக நடித்திருந்த அஜ்மல் அமீர் தற்போது நெற்றிக்கண் படத்தில் ஒரு முக்கிய ரோலில் நடித்து வருகிறார்.

தற்போது 80 சதவீத படப்பிடிப்பு முடிந்துவிட்டது என படக்குழு கூறியுள்ளது. கொரோனா பாதிப்பு தடுக்க அரசு பிறப்பித்த உத்தரவு காரணமாக தற்போது ஷூட்டிங் நிறுத்தப்பட்டுள்ளது.

நெற்றிக்கண் பட இயக்குனர் மிலிந்த் ராவ் பிறந்தநாளை ஷூட்டிங் ஸ்பாட்டில் கேக் வெட்டி படக்குழு கொண்டாடியுள்ளனர். அப்போது எடுக்கப்பட்டுள்ள புகைப்படங்களையும் ட்விட்டரில் வெளியிட்டுள்ளனர். அது இணையத்தில் வைரலாகி உள்ளது.