பல ஹீரோக்களை உருவாக்கிய பாரதிராஜாவுக்கே பேர் வாங்கிக் கொடுக்கும் குரங்கு பொம்மை!

நீண்ட இடைவெளிக்குப் பிறகு வந்த இயக்குனர் பாரதிராஜாவுக்கு குரங்கு பொம்மை படத்தின் மூலம் நல்ல வரவேற்பு கிடைத்துள்ளது.

தமிழ் சினிமாவில் முன்னணி இயக்குனர்களில் ஒருவர் பாரதிராஜா. மண் மணம் மாறாத பாரதிராஜா பெருமபாலும் கிராமத்து பாணியில் பல படங்களை இயக்கி பல விருதுகளை பெற்றுள்ளார். இந்த நிலையில், கதிர் இயக்கத்தில் வந்த இதயம் படத்தில் சிறப்பு தோற்றத்தில் நடித்ததன் மூலம், திரையில் வரத் தொடங்கினார். பின்னர் மணிரத்னம் இயக்கத்தில் வந்த ஆய்த எழுத்து படத்தின் மூலம் குணச்சித்திர நடிகர் வேடத்தில் நடித்து கலக்கினார். இதனைத் தொடர்ந்து ரெட்டைசுழி இயக்குனர் சிகரம் கே.பாலசந்தர் உடன் இணைந்து முன்னணி வேடத்தில் நடித்தார். அதன் பிற்கு விஷால் நடிப்பில் வந்த பாண்டிய நாடு படத்தில் நடித்து சிறந்த துணை நடிகருக்கான விஜய் விருதும் பெற்றார்.



இந்நிலையில், கிட்டத்தட்ட 3 வருடத்திற்குப் பிறகு தற்போது மீண்டும் குரங்கு பொம்மை படத்தின் மூலம் களத்தில் இறங்கியுள்ளார். நித்திலன் இயக்கத்தில் உருவான குரங்கு பொம்மை கடந்த 1ம் தேதி அன்று திரைக்கு வந்தது. இப்படத்தில் விதார்த், டெல்னா டேவிஸ், கஞ்சா கருப்பு ஆகியோருடன் இணைந்து முன்னணி ரோலில் நடித்துள்ளார். ரசிகர்களிடையே நல்ல வரவேற்பைப் பெற்றுள்ள இப்படம், அளவுக்கு அதிகமாக ஆசைப்படும் மனிதனுக்கு அதனால் ஏற்படும் விளைவுகள் பற்றிய கதையை மையப்படுத்தி உருவாக்கப்பட்டுள்ளது.

பல நடிகர்களை உருவாக்கிய பாரதிராஜா, பல குணச்சித்திர கதாபாத்திரங்களில் நடித்திருந்தாலும் கூட குரங்கு பொம்மை அவரது நடிப்புலக வாழ்வில் முக்கிய திருப்பமாக அமைந்துள்ளது. சொல்லப்போனால் படத்தின் நாயகனான விதார்த்-ஐ தன் நடிப்பு திறமையால் மறக்க வைத்து விட்டார். அந்தளவுக்கு அனைத்து காட்சிகளிலும் தத்ரூபமாக நடித்து நடிப்புக்கு நங்கூரம் சூட்டியுள்ளார். இந்தப் படத்தின் மூலம் சிறந்த குணச்சித்திர நடிகர், துணை நடிகருக்கான பல விருதுகள் கிடைக்கும் என்று எதிர்பார்க்கப்படுகிறது.