கொரோனா பரிதாபங்கள்: 21 நாட்கள் ஊரடங்கிற்கு முன், பின்: தெறிக்கும் மீம்ஸ்

கொரோனா வைரஸ் உலகம் முழுவதும் பரவிக் கொண்டிருக்கிறது. இத்தாலி, ஸ்பெயின் ஆகிய நாடுகளில் கொரோனா வைரஸ் கோரதாண்டவம் ஆடிக் கொண்டிருக்கிறது. இந்நிலையில் தான் வைரஸ் பரவுவதை தடுக்க இந்தியாவில் 21 நாட்கள் ஊரடங்கு அமல்படுத்தப்பட்டுள்ளது. அப்படி இருந்தும் சிலர் யார் சொன்னாலும் கேட்க மாட்டேன் என்று ஊர் சுற்றுகிறார்கள். இந்நிலையில் ஒருவர் மாதவனை வைத்து மீம்ஸ் போட்டுள்ளார்.

21 நாட்களாக வீட்டில் இருந்தால் முடி எல்லாம் நரைத்து, தாடி வளர்ந்து பார்க்க இப்படித் தான் இருப்போம் என்று கூறி மாதவனின் இரண்டு புகைப்படங்களை ஒருவர் ட்விட்டரில் வெளியிட்டார். அதை பார்த்த மாதவனோ, ஆமாய்யா ஆமாம் என்று சிரித்துள்ளார். கொரோனாவை பற்றி பயம் இருந்தாலும் மீம்ஸ் போட்டு கலாய்த்து ஜாலியாக சிரித்துக் கொண்டிருக்கிறார்கள் இந்தியர்கள் என்பது குறிப்பிடத்தக்கது.

மீம்ஸுக்கு மாதவன் பதில் அளித்ததை பார்த்த ரசிகர்கள் சார், வயசானாலும் அப்படியே தான் இருக்கிறீர்கள். தலைமுடியின் நிறம் மட்டுமே மாறியுள்ளது. மற்றபடி இன்னும் இளமையாகத் தான் இருக்கிறீர்கள். தாடி எல்லாம் வளர்க்காதீங்க சார். அதுவும் கொரோனாவுக்கு நல்லது இல்லையாம். பார்த்து சூதானமா இருங்க மாதவன் என்று ரசிகர்கள் தெரிவித்துள்ளனர்.

கொரோனா வைரஸால் படப்பிடிப்புகள் ரத்தாகியுள்ளதால் மாதவன் வீட்டில் தான் இருக்கிறார். அதனால் அவர் சமூக வலைதளங்களில் ஆக்டிவாக உள்ளார். முன்னதாக கொரோனா காலர் டியூனில் வரும் இருமல் சத்தத்தை நீக்க வேண்டும் என்று மாதவன் கோரிக்கை விடுத்திருந்தார். ஆனால் அவரின் கோரிக்கை இன்னும் நிறைவேறவில்லை. இந்த கொரோனாவை விட கொரோனா காலர் டியூன் பயங்கரமாக இருக்கிறது என்கிறார்கள் மக்கள்.