விற்பனைக்கு வந்த நடிகையர் திலகம் ஃபேஷன் புடவைகள்!

நடிகையர் திலகம் படத்தில், கீர்த்தி சுரேஷ் அணிந்து நடித்த புடவைகள் தற்போது விற்பனைக்கு வந்துள்ளது.

இருபதாம் நூற்றாண்டில் தென்னிந்திய சினிமாவின் ஆளுமையாகக் கருதப்படும், நடிகை சாவித்திரியின் வாழ்க்கையை மையப்படுத்தி எடுக்கப்பட்ட நடிகையர் திலகம் படம் சமீபத்தில் வெளியாகி அமோக வரவேற்பை பெற்றது.

இந்த படத்தில் கீர்த்தி சுரேஷின் நடிப்பை விட, அவர் அணிந்து வந்து ஆடை, அணிகலன்கள் ரசிகர்களை வெகுவாகக் கவர்ந்தன. அதன் தாக்கமாக பல இளம்பெண்கள் சாவித்திரி போல மேக்கப் போட்டுக்கொண்டும், புடவை அணிந்து கொண்டும் புகைப்படங்கள் எடுத்து சமூக வலைதளங்களில் பதிவிட்டு வந்தனர். மேலும் நடிகையர் திலகம் படத்தில் கீர்த்தி சுரேஷ் பேசும் வசனங்களை, அழகான முகப்பாவனைகளுடன் டப்ஸ்மாஷ் செய்து வெளியிட்டு வந்தனர்.


இந்நிலையில் ரசிகைகளின் ஆசையைப் போக்கும் வகையில் நடிகையர் திலகம் புடவைகள் முதன்முதலாக விற்பனைக்கு வந்துள்ளது. கடைகளில் விற்பனைக்கு வந்துள்ள இந்த புடவைகளை அங்குவரும் பெரும்பாலான இளம்பெண்கள் கேட்டு வாங்கிச் செல்வதாக விற்பனையாளர்கள் தெரிவிக்கின்றனர்.