கொஞ்சம் அட்ஜெஸ்ட் பண்ண சொன்ன தமிழ் இயக்குநர் - அம்பலப்படுத்திய பிரபல மலையாள நடிகை!

கடந்த ஆண்டு #MeToo விவகாரம், நாடு முழுவதும் பெரும் அதிர்வலைகளை ஏற்படுத்தியது. பாலியல் துன்புறுத்தலுக்கு ஆளான, தவறான பாதைக்கு அழைக்கப்பட்ட நபர்கள் யார் என்று வெளியுலகிற்கு தெரியவந்தது. இந்த பிரச்னை பாலிவுட்டில் தொடங்கி, தமிழ் திரையுலகையும் விட்டு வைக்கவில்லை. அதில் கவிஞர் வைரமுத்து, சுசி கணேசன், அர்ஜூன் சர்ஜா, பாடகர் கார்த்திக் ஆகியோரின் பெயர்கள் தவறான செயல்களில் ஈடுபட்டதாக குற்றம்சாட்டப்பட்டது.

தேசிய அளவில் பெரும் அவமானங்கள் ஏற்பட்டாலும், வாய்ப்புகள் தருவதாக கூறி பெண்களை தவறாக அழைக்கும் பழக்கம் நின்ற பாடில்லை. இந்நிலையில் பிரபல மலையாள நடிகை சஜிதா மாடத்தில், தமிழ் இயக்குநர் கார்த்திக் மீது அதிர்ச்சிகர குற்றச்சாட்டை முன்வைத்துள்ளார். இவர் ஐ.ஏ.என்.எஸ் செய்தி நிறுவனத்திற்கு அளித்த பேட்டியில், கடந்த திங்கள் அன்று எனக்கு ஒரு தொலைபேசி அழைப்பு வந்தது.

அப்போது என்னைப் பற்றியும், எனது படங்கள் குறித்தும் கேள்விகள் கேட்டனர். அதன்பிறகு தான் எதிர்பார்க்காத விஷயம் நடந்தது. நீங்கள் எனது படத்தில் நடிப்பதற்கு கொஞ்சம் அட்ஜெஸ்ட் பண்ண வேண்டும். என்ன சொல்கிறீர்கள்? என்று கேட்கப்பட்டது. இதனால் நான் அதிர்ச்சி அடைந்தேன் என்று கூறினார்.

இதுதொடர்பாக தனது பேஸ்புக் பக்கத்தில் பதிவிட்டுள்ள சஜிதா மாடத்தில், இயக்குநர் கார்த்திக்கின் தொலைபேசி எண்ணை பதிவிட்டு நடந்ததை விவரித்துள்ளார். இந்நிலையில் சஜிதாவிற்கு பல்வேறு தரப்பினரும் ஆதரவாக கருத்து பதிவிட்டுள்ளனர். இந்நிலையில் தன் மீதான குற்றச்சாட்டை அறிந்து கொண்ட கார்த்திக், மன்னிப்பு கேட்க விரும்புவதாக கூறியுள்ளார்.

அதாவது சஜிதாவிற்கு தெரிந்தவர் மூலம், இந்த செய்தி அனுப்பப்பட்டுள்ளது. அதில் சஜிதா தனது கருத்தை தவறாக புரிந்து கொண்டதாக தெரிவித்துள்ளார். ஆனால் என்னுடைய நிலைப்பாட்டில் தெளிவாக இருப்பதாகவும், எதற்காக அவர் மன்னிப்பு கேட்க விரும்புகிறார் என்றும் சஜிதா கேள்வி எழுப்பியுள்ளார்.

கடந்த 1980ஆம் ஆண்டு முதல் மலையாள திரையுலகில் முக்கிய நடிகையாக வலம் வந்து கொண்டிருக்கிறார். 30 படங்களுக்கு மேல் நடித்துள்ள இவர், 2013ல் வெளியான “ஷட்டர்” படத்திற்கு சிறந்த நடிப்பிற்கான கேரள அரசின் விருதை வென்றுள்ளார்.