பண்ணைப்புரத்து இசைத் தென்றல் இளையராஜாவின் பிறந்தநாள் பகிர்வு

சென்னை: அன்னக்கிளியில் தூறலாய் தொடங்கி அறை நூற்றாண்டு காலம் அடைமழையாய் பொழிந்த இசையருவி, இன்று இசைக் கடலாய் பறந்து நின்று நம்மை பரவசபடுத்தி வரும் இசைஞானி இளையராஜாவின் 72வது பிறந்தநாள் இன்று.



தேனி மாவட்டம் பன்னைப்புரத்தில் ராமசாமி-சின்னத்தாயம்மாள் தம்பதிக்கு பிறந்தார். ராசய்யா என்ற இயற்பெயருடன் கடந்த 1976ல் அன்னக்கிளி என்ற படத்தின் மூலம் இசையமைப்பாளராக அறிமுகமாகினார்.

தமிழ், தெலுங்கு, மலையாளம், கன்னடம், இந்தி என பன்மொழிகளில் இசை விருந்து படைத்துள்ளார் மேஸ்ட்ரோ. இசையில் ஆயிரமாயிரம் பாடல்களைக் கடந்து அந்தந்தப் படங்களிலே இசைஞானி இளையராஜா இழைத்த பின்னணி இசையை ஆராய வாழ்நாள் போதாது. இதனால் தான் அவர் 'இசை பிதாமகராக' போற்றப்படுகிறார்.

தற்போது வரை 1,000 திரைப்படங்களுக்கு இசையமைத்து சாதனை மன்னனாக வலம்வரும் இளையராஜா, கடந்த 1993ல், லண்டன் ராயல் பில்ஹார்மானிக் ஆர்க்கெஸ்ட்ராவில், சிம்பொனிக்கு இசையமைத்து, ஆசிய கண்டத்தின் முதல் இசையமைப்பாளர் என்ற பெருமை பெற்றார்.

இசைஞானியின் சாதனைகளை அளவிடமுடியாது எனிலும், முனைவர் பட்டம், 5 தேசிய விருதுகள், கலைமாமணி, லதா மங்கேஷ்கர் விருது, கேரள அரசின் விருது, பத்ம பூஷன், உள்ளிட்ட பல்வேறு விருதுகளை குவித்துள்ளார்.