போட்டோகிராபர் பாலியல் தொல்லை கொடுத்தார்: இளம் பாடகி புகார்

ஹாலிவுட்டில் மீ டூ இயக்கம் தீவிரம் எடுத்து சற்று அடங்கியுள்ள நேரத்தில் பிரபல அமெரிக்க பாடகி கார்டி பி(26) பாலியல் புகார் தெரிவித்துள்ளார்.

தொலைக்காட்சி நிகழ்ச்சி ஒன்றில் கலந்து கொண்ட கார்டி பி கூறியதாவது,

நான் பத்திரிகை ஒன்றின் போட்டோஷூட்டில் கலந்து கொள்ள சென்றபோது நடந்ததை மட்டும் ஒருபோதும் மறக்கவே மாட்டேன். அந்த போட்டோஷூட்டில் புகைப்படக் கலைஞர் எனக்கு மிக அருகில் வந்தார். பின்னர் தனது ஆணுறுப்பை வெளியே எடுத்துக் காட்டினார்.

அதை பார்த்த நான் கோபப்பட்டு அவரை திட்டிவிட்டு அங்கிருந்து கிளம்பிச் சென்றேன். இதில் விந்தை என்னவென்றால் புகைப்படக் கலைஞரின் செயல் குறித்து நான் பத்திரிகையின் உரிமையாளரிடம் தெரிவித்தேன். அதற்கு அவரோ இப்போ அதற்கு என்ன என்பது போன்று பார்த்தார் என்றார்.

எந்த பத்திரிகை, யார் அந்த புகைப்படக் கலைஞர், இந்த சம்பவம் எப்பொழுது நடந்தது என்பதை கார்டி பி தெரிவிக்கவில்லை.

கடந்த 2017ஆம் ஆண்டு பல நடிகைகள் பிரபல தயாரிப்பாளர் ஹார்வி வெயின்ஸ்டீனுக்கு எதிராக பாலியல் புகார் தெரிவித்தார்கள். இதையடுத்து ஹாலிவுட்டில் மீ டூ இயக்கம் வேகம் எடுத்தது. பட வாய்ப்புக்காக வெயின்ஸ்டீன் தங்களை பாலியல் பலாத்காரம் செய்ததாக சில நடிகைகளும், தங்களை கட்டாயப்படுத்தி ஓரல் செக்ஸ் வைத்துக் கொண்டதாக சில நடிகைகளும் தெரிவித்தனர்.

ஹாலிவுட்டை அடுத்து பாலிவுட்டிலும் மீ டூ இயக்கம் புத்துயிர் பெற்றது. பாலிவுட் நடிகை தனுஸ்ரீ தத்தா பிரபல நடிகர் நானா படேகர் மீது பாலியல் புகார் தெரிவித்ததை பார்த்து பிற நடிகைகளும் தங்களுக்கு நடந்த கொடுமைகள் பற்றி தைரியமாக பேசத் துவங்கினார்கள் என்பது குறிப்பிடத்தக்கது.