உச்ச நடிகர்கள்
1990 மற்றும் 2000களில் இந்திய சினிமாவில் முன்னணி நடிகையாக வலம் வந்தவர் நடிகை மீனா. உச்ச நட்சத்திரங்களான ரஜினிகாந்த் மற்றும் கமல்ஹாசனுக்கு ஜோடியாக நடித்துள்ள மீனா, மாஸ் நடிகர்களான அஜித் மற்றும் விஜய்யுடனும் இணைந்து பணியாற்றியுள்ளார்.
கணவர் மரணம்
தென்னிந்திய சினிமாவில் சுமார் 300க்கும் மேற்பட்ட படங்களில் நடித்துள்ள மீனா கடந்த 2009ஆம் ஆண்டு பெங்களூரைச் சேர்ந்த மென் பொறியாளர் வித்யாசாகரை திருமணம் செய்து கொண்டார். இவர்களுக்கு ஒரு பெண் குழந்தை உள்ள நிலையில் வித்யாசாகர் நேற்றிரவு உடல்நலக்குறைவால் காலமானார்.
பகீர் தகவல்
இந்நிலையில் அவரது உடல்நிலை மற்றும் மரணம் தொடர்பாக பகீர் தகவல் வெளியாகியுள்ளது. அதாவது ஏற்கனவே நுரையீரல் தொற்றால் பாதிக்கப்பட்டிருந்தார் வித்யா சாகர். இந்த நேரத்தில்தான் அவருக்கு கடந்த 3 மாதங்களுக்கு முன்பு கொரோனா தொற்று ஏற்பட்டது.
பிந்தைய விளைவு
கொரோனாவில் இருந்து மீண்டு வந்த பிறகும் கூட அதன் பிந்தைய விளைவுகளால் பாதிக்கப்பட்டிருந்தார் வித்யாசாகர். இதற்காக சென்னை ஆழ்வார் பேட்டையில் உள்ள மருத்துவமனையில் சிகிச்சை பெற்றுவந்த நிலையில் 2 நாட்களுக்கு முன்பு சென்னை அமைந்தகரையில் உள்ள தனியார் மருத்துவமனையில் அனுமதிக்கப்பட்டார்.
வெண்டிலேட்டர்
வித்யாசாகரின் நுரையீரல் முற்றிலும் சேதமடைந்து மாற்றும் நிலை உருவானதால் அவருக்கு வெண்டிலேட்டர் சப்போர்ட்டுடன் சிகிச்சை அளிக்கப்பட்டு வந்தது. அதேநேரத்தில் நுரையீரல் மாற்று அறுவை சிகிச்சைக்கான ஏற்பாடுகளும் நடந்து வந்தது. ஆனால் மாற்று நுரையீரல் கிடைப்பதில் தாமதம் ஏற்பட்டதால் அறுவை சிகிச்சை இல்லாமல் அவரை காப்பாற்றும் முயற்சிகளை மேற்கொண்டனர் மருத்துவர்கள்.
பெரும் துயரம்
இந்த நேரத்தில்தான் வெண்டிலேட்டர் சிகிச்சையும் பலனளிக்காமல், மாற்று உறுப்பும் கிடைக்காமல் பரிதாபமாக உயிரை விட்டுள்ளார் வித்யாசாகர். செலவு செய்து உயிரை காப்பாற்ற தயாராக இருந்தபோதும் மாற்று உறுப்பு கிடைக்காமல் 48 வயதிலேயே வித்யா சாகர் மனைவியையும் மகளையும் பிரிந்தது குடும்பத்தினரை பெரும் துயரத்தில் ஆழ்த்தியுள்ளது.