தள்ளிப்போன ‘மீண்டும் ஒரு காதல் கதை’!

‘மீண்டும் ஒரு காதல் கதை’ படம் வெளியாகும் தேதி தள்ளி வைக்கப்பட்டுள்ளது.


புதுமுகம் வால்டர் பிலிப்ஸ் மற்றும் இஷா தல்வார் நடிப்பில் உருவாகியுள்ள ‘மீண்டும் ஒரு காதல் கதை’ படத்தின் ரிலீஸ் தேதி தள்ளி வைக்கப்பட்டுள்ளது. மலையாளத்தில் வெளிவந்த ‘தட்டத்தின் மறையத்து’ படத்தின் ரீமேக்காக உருவாகியிருக்கும் ‘மீண்டும் ஒரு காதல் கதை’ படத்தை மித்ரன் ஜவஹர் இயக்கியுள்ளார்.


இப்படத்தில் வால்டர் பிலிப்ஸ், இஷா தல்வார், நாசர், தலைவாசல் விஜய், வித்யுலேகா உள்ளிட்டோர் நடித்துள்ளனர். இப்படம் இன்று (5-ந் தேதி) வெளியாவதாக படக்குழுவினர் அறிவித்திருந்தனர். படத்தை வெளியிடுவதற்கு முன்பாக தயாரிப்பாளர் சங்க தலைவர் கலைப்புலி எஸ்.தாணு மற்றும் விநியோகஸ்தர்களுக்கு படக்குழுவினர் இப்படத்தை திரையிட்டு காண்பித்துள்ளனர்.


படத்தை பார்த்த அவர்கள், படம் நன்றாக வந்துள்ளதாகவும், ஒன்றிரண்டு வாரங்கள் தள்ளி, சரியான தேதியில் படத்தை வெளியிட்டால் மக்களிடம் நல்ல வரவேற்பை பெற்று மிகப்பெரிய வெற்றி பெறும் என்று கூறியுள்ளனர்.இதையடுத்து,படத்தின் தயாரிப்பாளர்கள் படத்தை இன்னும் ஒன்றிரண்டு வாரங்கள் தள்ளி வெளியிட முடிவு செய்துள்ளனர்.