Dhanush: எனை நோக்கி பாயும் தோட்டாவை நம்பியிருக்கும் மேகா ஆகாஷ்!

இயக்குநர் பாலாஜி தரணிதரன் இயக்கத்தில் உருவாகி வரும் ஒரு பக்க கதை படத்தின் மூலம் தமிழில் அறிமுகமானவர் நடிகை மேகா ஆகாஷ். கடந்த 2014 ஆம் ஆண்டு தொடங்கப்பட்ட இப்படத்தின் படப்பிடிப்பு இன்னும் முடிக்கப்படவில்லை. இதனால், இப்படம் இன்னும் திரைக்கு வரவில்லை

இதே போன்று இயக்குநர் கௌதம் மேனன் இயக்கத்தில் கடந்த 2016 ஆம் ஆண்டு தொடங்கப்பட்ட படம் எனை நோக்கி பாயும் தோட்டா. இப்படத்தில் தனுஷுக்கு ஜோடியாக நடித்திருந்தார். எனினும் அந்தப் படம் இதுவரை வெளியாகவில்லை. வரும் 29 ஆம் தேதி தான் வெளியாக இருக்கிறது.

இப்படி அடுத்தடுத்து தொடங்கப்பட்ட இந்தப் படங்கள் திரைக்கு வராததால் சோகத்தில் இருந்து மேகா ஆகாஷிற்கு பேட்ட படம் புதிய உற்சாகத்தை கொடுத்துள்ளது. இதில், எந்த நடிகைக்கும் கிடைக்காத பாக்கியம் இவருக்கு கிடைத்துள்ளது. ரஜினியுடன் இணைந்து நடித்துள்ளார். அதனால், தான் பேட்ட படம் அவரது அறிமுக படமாக கருதப்படுகிறது.

ரஜினிகாந்த் நடிப்பில் வந்த பேட்ட படத்தின் மூலம் தமிழ் சினிமாவில் திரைக்கு வந்தவர் நடிகை மேகா ஆகாஷ். இந்த ஆண்டு பொங்கல் பண்டிகையை முன்னிட்டு திரைக்கு வந்த இப்படத்தில், அன்வரின் காதலியாக நடித்திருந்தார். இப்படத்தைத் தொடர்ந்து சிம்பு நடிப்பில் வந்த வந்தா ராஜாவாத்தான் வருவேன் படத்தில் சிம்புவிற்கு ஜோடியாக நடித்து அனைவரிடம் பாராட்டு பெற்றார். இதையடுத்து, அதர்வா நடிப்பில் வந்த பூமராங் படம் வெளியானது. இப்படத்திற்கு அந்தளவிற்கு வரவேற்பு கிடைக்கவில்லை.

இந்தப் படங்களைத் தொடர்ந்து, மனு சரித்ரா என்ற தெலுங்கு படத்திலும், யாதும் ஊரே யாவரும் கேளிர் என்ற தமிழ் படத்திலும் அடுத்தடுத்து நடித்து வருகிறார். இந்த நிலையில் பேட்ட, வந்தா ராஜாவாத்தான் வருவேன் ஆகிய படங்களைத் தொடர்ந்து தனது மார்க்கெட்டைப் பிடிக்க எனை நோக்கி பாயும் தோட்டா படத்தை மட்டுமே நம்பியிருக்கிறார். இந்தப் படத்தை தவிர வேறு எந்தப் படமும் கையில் இல்லை.

பேட்ட, வந்தா ராஜாவாத்தான் வருவேன் ஆகிய படங்களைப் போன்று இந்தப் படமும் காதலை மையப்படுத்திய படம் என்பதால், ரசிகர்களிடையே தாறுமாறாக வரவேற்பு பெறுவார் என்று எதிர்பார்க்கப்படுகிறது.