மெர்சல் படத்தை ஓட வைத்த ரசிகர்களுக்கு விஜய் நன்றி!!

மெர்சல் படத்தை வெற்றிப் படமாக்கிய அனைவருக்கும் நன்றி என்று நடிகர் விஜய் தனது ஃபேஸ்புக்கில் பதிவு செய்துள்ளார்.

மெர்சல் படத்தை தயாரிப்பாளர் துவங்கிய நேரம் சரியில்லை என்றுதான் சொல்ல வேண்டும். அந்தளவிற்கு பிரச்சனைகளை சந்தித்து இறுதியாக தீபாவளியன்று திரைக்கு வந்தது. விஜய் ரசிகர்களுக்கு இந்தப் படம் பெரிய தீபாவளி விருந்து என்றுதான் கூற வேண்டும். அந்தளவிற்கு வரவேற்பு இருந்தது. வசூலிலும் சாதனை படைத்து வருகிறது.

இந்தப் படத்தில் இடம் பெற்ற ஜிஎஸ்டி மற்றும் டிஜிட்டல் இந்தியா தொடர்பான வசனங்கள் பாஜகவை கடுப்பாக்கியுள்ளது. தமிழக பாஜக தலைவர் தமிழிசை உள்பட பாஜக தலைவர்கள் எதிர்ப்பு தெரிவித்து வருகின்றனர். மத்திய அமைச்சர் பொன். ராதா கிருஷ்ணனும் இன்று எதிர்ப்பு தெரிவித்து இருந்தார்.

எதிர்ப்பு ஒரு பக்கம் இருந்தாலும் இந்தப் படம் உலகம் முழுவதும் நல்ல வசூலைப் பெற்று வருகிறது. படம் திரைக்கு வந்த முதல் நாள் மட்டும் தமிழ்நாட்டில் ரூ.22 முதல் ரூ.24 கோடி வரை வசூலித்து இருப்பதாக வினியோகஸ்தர்கள் தரப்பில் தெரிவிக்கப்பட்டது. இது ரஜினியின் கபாலி படத்தின் முதல் நாள் வசூல் சாதனை மற்றும் விஜய்யின் ‘தெறி’ படத்தின் முதல் நாள் வசூல் சாதனையை விட அதிகமாகும்.

கடந்த இரண்டு நாட்களில் மட்டும் உலகம் முழுவதும் 100 கோடி ரூபாய்க்கும் மேல் வசூல் செய்து இருப்பதாக தகவல் வெளியாகியுள்ளது.

இந்த நிலையில், மெர்சல் படத்தை வெற்றிப்படமாக்கிய அனைவருக்கும் நன்றி என்று தனது ஃபேஸ்புக் பக்கத்தில் நடிகர் விஜய் பதிவு செய்துள்ளார்.