கபாலி பாடல்கள் வெளியீடு: "இசை டா"

சென்னை: பெரிதும் எதிர்பார்க்கப்பட்ட கபாலி படத்தின் பாடல்கள் அடங்கிய குறுந்தகடு வெளியிடப்பட்டது.

ரஞ்சித் இயக்கத்தில் ரஜினி, ராதிகா ஆப்தே, கலையரசன், தினேஷ், ருத்விகா உள்ளிட்ட பலர் நடிப்பில் உருவாகி இருக்கும் படம் 'கபாலி'. சந்தோஷ் நாராயணன் இசையமைத்திருக்கும் இப்படத்தை தாணு தயாரித்திருக்கிறார். இசை உரிமையை திங்க் மியூசிக் நிறுவனம் கைப்பற்றியுள்ளது.

இப் படத்தின் "டீஸர்' அண்மையில் வெளியாகி, ரசிகர்களின் அமோக வரவேற்பைப் பெற்றது. அதனைத்தொடர்ந்து, இப் படத்தின் பாடல்கள் மற்றும் "டிரெய்லர்" பிரம்மாண்ட விழாவின் மூலம் வெளியாகும் எனக் கூறப்பட்டு வந்தது. ஆனால், ரஜினிகாந்தின் அமெரிக்க பயணத்தால் இந் நிகழ்வில் மாற்றம் ஏற்பட்டது.

மேலும், படத்தின் இசை வெளியீட்டு விழாவை பிரம்மாண்டமாக நடத்தாமல் நேரடியாக யூ-டியூப் தளத்தில் வெளியிட படக்குழு திட்டமிட்டிருப்பதாக கூறப்பட்டது.

அதன்படி, நடைபெற்ற சிறிய நிகழச்சியில் கபாலி படத்தில் இடம்பெற்றுள்ள பாடல்கள் அடங்கிய சிடி வெளியிடப்பட்டது. இந்நிகழ்ச்சியில், படத்தின் தயாரிப்பாளர் கலைப்புலி எஸ்.தாணு, இசையமைப்பாளர் சந்தோஷ் நாராயணன், ரஜினியின் இளைய மகள் சௌந்தர்யா, இயக்குநர் பா.ரஞ்சித் உள்ளிட்ட பலர் கலந்து கொண்டனர்.

தொடர்ந்து, யூ-டியூப்பில் கபாலி படப் பாடல்கள் அனைத்தும் பதிவேற்றம் செய்யப்பட்டன. கபாலி படத்தின் டீசர் படைத்த சாதனைகளை போல், பாடல்களும் சூப்பர் ஹிட்டாகும் என்று எதிர்பார்க்கப்படுகிறது.