18 வருடங்களுக்கு பிறகு மீண்டும் தமிழில் நடிக்கும் சர்வதேச இந்திய நடிகர்..!!

இந்திய சினிமாவை உலக அரங்கிற்கு எடுத்துச் சென்ற முக்கிய நடிகர்களில் ஒருவர் நஸ்ருதின் ஷா. இந்தியாவில் பல மொழிப் படங்களில் நடித்துள்ள இவர், குறிப்பிட்ட சில ஹாலிவுட் படங்களிலும் நடித்து முத்திரை பதித்துள்ளார்.

2000ம் ஆண்டு கமல்ஹாசன் இயக்கி நடித்த ’ஹேராம்’ படத்தில் நஸ்ருதின் ஷா, மகாத்மா காந்தி கதாபாத்திரத்தில் நடித்திருப்பார். அதில் தனது சொந்த குரலில் தமிழ் பேசி கதாபாத்திரத்திற்கு அவர் உயிர் ஊட்டியிருப்பார்.

இந்நிலையில் 18 வருடங்கள் கழித்து மீண்டும் இவரை தமிழ் படத்தில் நடிக்க வைக்க பேச்சுவார்த்தை நடந்து வருவதாக தெரியவந்துள்ளது. பிரகாஷ் ராஜ் இயக்கும் படத்தில் நஸ்ருதின் ஷா நடிக்கவுள்ளதாகவும், சமீபத்தில் பிரகாஷ் ராஜ் அவரை சந்தித்து படத்தின் கதையை கூறி சம்மதம் பெற்றதாகவும் தெரியவந்துள்ளது.

பிரகாஷ் ராஜ் - நஸ்ருதின் ஷா கூட்டணியில் உருவாகும் இந்த படம், மக்கள் அரசியலை பற்றி பேசும் படமாக இருக்கலாம் என தகவல்கள் கிடைத்துள்ளன. இதன் காரணமாக, நஸ்ருதீன்ஷா நடிக்க உள்ள தமிழ் படத்தின் அதிகாரப்பூர்வ அறிவிப்பு விரைவில் வெளியாகலாம் என எதிர்பார்க்கப்படுகிறது.