4 நாட்களில் 5 மில்லியன் வியூகளை அள்ளிய 'கல்யாண வயசு' பாடல்!!

நயன்தாரா நடிப்பில் உருவாகி வரும் ‘கோலமாவு கோகிலா’ படத்தில் இடம்பெற்ற ‘கல்யாண வயசு’ பாடல், 4 நாட்களில் 5 மில்லியன் பார்வைகளைப் பெற்று இணையத்தை கலக்கி வருகிறது.

நடிகை நயன்தாரா அடுத்ததாக, நெல்சன் திலீப்குமார் இயக்கத்தில் ‘கோலமாவு கோகிலா’ என்ற புதிய படத்தில் நடித்து வருகிறார். இதில், நயன்தாராவுடன் யோகி பாபு, சரண்யா பொன்வண்ணன், அறந்தாங்கி நிஷா மற்றும் ஜாக்குலின் உள்ளிட்ட பலரும் நடித்து வருகின்றனர்.

அனிருத் இசையமைக்கும் இப்படத்தின் ‘எதுவரையோ’ பாடல் ஏற்கனவே வெளியாகி, ரசிகர்கள் மத்தியில் நல்ல வரவேற்பைப் பெற்ற நிலையில், கடந்த சில தினங்களுக்கு முன் ‘கல்யாண வயசு’ என்ற இரண்டாவது பாடலை யூடியூப்பில் வெளியிட்டுள்ளனர்.

காமெடி நடிகர் யோகி பாபு நயன்தாராவை ஒருதலைக் காதல் செய்வதாக அமைந்திருக்கும் இப்பாடலுக்கு ரசிகர்கள் மத்தியில் தற்போது அமோக வரவேற்பு கிடைத்துள்ளது. யூடியூப் டிரெண்டிங்கில் முதல் இடத்தில் இருக்கும் இப்பாடல், இதுவரை 5 மில்லியன் முறை பார்க்கப்பட்டுள்ளது.