‘அவெஞ்சர்ஸ்’ போன்ற படங்களில் நடிக்க விரும்பும் நிவேதா பெத்துராஜ்!

‘ஒரு நாள் கூத்து’ படத்தின் மூலம் தமிழ் சினிமாவில் அறிமுகமானவர் நடிகை நிவேதா பெத்துராஜ். அதையடுத்து அவர் நடிப்பில் வெளியான படம் ‘பொதுவாக எம்மனசு தங்கம்’. இந்தப் படத்தில் இடம் பெற்ற அடியே அழகே பாடலின் மூலம் ரசிகர்கள் மத்தியில் பெரும் வரவேற்பை பெற்றார்.

தமிழில் அடுத்தடுத்து பல திரைப்படங்களில் ஒப்பந்தமாகி நடித்து வருகிறார். இந்நிலையில் ஹாலிவுட் படங்களில் நடிக்க விரும்புவதாக நிவேதா பெத்துராஜ் தன்னுடைய விருப்பத்தை தெரிவித்துள்ளார். தற்போது இவர் நடிப்பில் உருவாகியுள்ள ‘பொன் மாணிக்கவேல்’, ‘ஜகஜால கில்லாடி’, ‘பார்டி’ ஆகிய படங்கள் திரைக்கு வரவுள்ளன.

இதனையடுத்து விஜய் சேதுபதியுடன் விஜய் சந்தர் இயக்கும் திரைப்படத்தில் நடிக்க ஒப்பந்தமாகி உள்ளார். இந்த படத்தின் படப்பிடிப்பு ஏப்ரல் மாதம் தொடங்குகிறது. இந்நிலையில் நடிகை நிவேதா பெத்துராஜுக்கு ஹாலிவுட்டில் நாயகியாக வேண்டும் என்பது தான் கனவாம். அதனை நிறைவேற்ற மே அல்லது ஜூன் மாதத்தில் இவர் அமெரிக்கா செல்ல இருக்கிறார்.

அங்கு சில வேலைகள் இருப்பதாகவும் அவை கைக்கூடி வந்தால் நல்ல செய்தி வரும் என்றும் நிவேதா தெரிவித்துள்ளார். பிரியங்கா சோப்ரா போல ஹாலிவுட்டிலும் ஒரு ரவுண்டு வரவேண்டும் என்று தெரிவித்திருக்கும் நிவேதா, அவெஞ்சர்ஸ் திரைப்படங்களில் நடிக்க வேண்டும் என்றும் தெரிவித்துள்ளார்.