ஷகீலா படத்தில் இணைந்த ‘காலா’ பட நடிகர்!

‘காலா’ படத்தில் போலீஸாக நடித்த நடிகர் பங்கஜ் திரிபாதி ஷகீலாவின் வாழ்க்கை வரலாறு படத்தில் நடித்து வருகிறார்.

ஒரு காலத்தில் தென்னிந்திய மொழி சினிமாவை ஒரு கலக்கு கலக்கியவர் நடிகை ஷகீலா. இவர் மலையாள சினிமாவில் முன்னணி நடிகையாக இருந்து வந்தார். இவருக்கு மலையாள சினிமாவில் ஏகப்பட்ட ரசிகர்கள் இருந்தனர். ஒரு கட்டத்தில் ஷகீலாவின் அபார வளர்ச்சியைக் கண்டு மலையாள திரையுலகினர் அவரை அங்கிருந்து கிளப்பிவிட்டனர்.

அங்கிருந்து வந்து தமிழ் சினிமாவில் சில படங்களில் நடித்தார். தற்போது அவரின் வாழ்க்கை வரலாறு படமாக எடுக்கப்பட்டு வருகிறது. இந்தப் படத்தில் ஷகீலா கேரக்டரில் ரிச்சா சத்தா நடித்து வருகிறார். இப்படத்தின் ஃபர்ஸ்ட் லுக் புகைப்படம் அண்மையில் வெளியானது. இப்படத்தின் படப்பிடிப்புகள் தற்போது நடைபெற்று வருகிறது.

இந்நிலையில் இப்படத்தின் முக்கிய வேடத்தில் பாலிவுட் சினிமாவின் பிரபல பங்கஜ் திரிபாதி இணைந்துள்ளார். இவர் அண்மையில் ரஜினிகாந்த் நடிப்பில் வெளியான ‘காலா‘ படத்தில் போலிஸ் அதிகாரியாக நடித்துள்ளார்.