'அந்த' ஒரு விஷயத்தில் மட்டும் ரஜினிக்கு ஹேட்டர்ஸே இருக்க முடியாது

ரஜினிகாந்த் இன்று தனது 70வது பிறந்தநாளை கொண்டாடுகிறார். கர்நாடக மாநிலம் பெங்களூரில் பஸ் கண்டக்டராக இருந்த ரஜினி தன் திறமை மீது நம்பிக்கை வைத்து தமிழகத்திற்கு வந்தார். வந்தாரை வரவேற்று வாழ வைக்கும் தமிழகம் ரஜினியை சூப்பர் ஸ்டார் ஆக்கி அதிகம் சம்பளம் வாங்கும் நடிகராக்கியது.

நாட்டின் பிரதமர், பெரிய தொழில் அதிபர்கள் எல்லாம் வாழ்த்து தெரிவிக்கும் அளவுக்கு பெரிய உயரத்தில் இருக்கிறார். சென்னையில் செட்டில் ஆன ரஜினி தன்னை வாழ வைக்கும் தமிழக மக்களுக்காக அரசியல் கட்சி துவங்கப் போவதாக அறிவித்துள்ளார்.

ஜனவரி மாதம் அவர் அரசியல் கட்சியை துவங்கவிருக்கிறார். அதற்கான வேலையில் ஈடுபட்டுள்ளார் ரஜினி. அவர் கட்சி துவங்குகிறேன் என்று அறிவித்ததும் பல மீம்ஸுகள் சமூக வலைதளங்களில் வலம் வருகிறது. ரஜினியை கிண்டல் செய்து மீம்ஸ் வருவது ஒன்றும் புதிது அல்ல.

இத்தனை ஆண்டு காலமாக சும்மா இருந்துவிட்டு 70 வயதில் கட்சி துவங்குகிறார் என்று விமர்சிக்கிறார்கள். பேரனுக்கு டீனேஜ் ஆகிவிட்டது ஆனால் இன்னும் தன் மகள்களை விட சிறு வயது பெண்களுடன் ஜோடி சேர்ந்து நடிக்கிறார் என்று விமர்சிக்கிறார்கள். இந்த விமர்சனங்கள் எல்லாம் அவர் காதில் விழாமல் இல்லை.

ரஜினியிடம் இருந்து ஒரு விஷயத்தை அனைவரும் கற்றுக் கொள்ள வேண்டும். 40 வயதாகிவிட்டாலே வயசாச்சு என்று பலரும் புலம்புகிறார்கள். 60களை கடந்தால் வீட்டில் கிருஷ்ணா, ராமா என்று இருக்கவே விரும்புகிறார்கள்.

கடைசி காலத்தில் புண்ணியம் தேட வேண்டும் என்கிறார்கள். வயது வெறும் எண் தான், அனைத்திற்கும் நம் மனது தான் காரணம். எத்தனை வயதானாலும் வாழ்க்கையை வாழ்ந்து பார்க்க வேண்டுமே தவிர, வயதை காரணம் காட்டி ஒரு ஓரமாக இருக்க வேண்டியது இல்லை என்பதை நிரூபித்துக் கொண்டிருக்கிறார் ரஜினி.

70 வயதிலும் இளைஞர்கள் பார்த்து பொறாமைப்படும் அளவுக்கு சுறுசுறுப்பாக இருக்க முடியும் என்பதற்கு ரஜினி ஒரு சிறந்த உதாரணம். மற்ற விஷயங்களில் ரஜினியை விமர்சித்தாலும் வயதானாலும் இளைஞரை போன்று இருக்க முடியும், வாழ்க்கையில் புது முயற்சிகள் எடுக்க முடியும் என்கிற விஷயத்தை ரஜினியிடம் இருந்து பலரும் கற்றுக்கொள்ள வேண்டும். ்இந்த விஷயத்தில் மட்டும் அவருக்கு ஹேட்டர்ஸே இருக்க முடியாது.

அரசியலுக்காக 24 ஆண்டு வழக்கத்தை மாற்றிய ரஜினி