மோகன்லால் மகனுக்கு ஜோடியாகும் கீர்த்தி சுரேஷ்!

சிவகார்த்திகேயன், விஜய், தனுஷ், சூர்யா, விக்ரம், விஷால் ஆகிய முன்னணி நடிகர்களுடன் ஜோடியாக சேர்ந்துநடித்துள்ளார் கீர்த்தி சுரேஷ். இவர் தற்போது மலையாள சூப்பர் ஸ்டார் மோகன்லால் மகனுக்கு ஜோடியாக நடிக்க உள்ளதாக கூறப்படுகிறது. கீர்த்தி சுரேஷ் தமிழ் சினிமாவில் காலடி எடுத்து வைத்து நான்கு ஆண்டுகளை கடந்து விட்டார். இருந்தாலும் சர்கார் படத்தை அடுத்து கீர்த்தி சுரேஷ் நடிப்பில் எந்த தமிழ் படமும் இதுவரை ரிலீஸாகவில்லை.

தமிழ் படங்கள் சரியாக ஓடாத காரணத்தினால் கீர்த்தி சுரேஷ் மலையாளம், தெலுங்கு படங்களில் தன் கவனத்தை செலுத்திக் கொண்டிருக்கிறார். இந்த நிலையில் பாலிவுட் செல்வதால் உடல் எடையை வெகுவாக குறைத்து எலும்பும் தோலுமாக இருக்கிறார் கீர்த்தி சுரேஷ்.

தற்போது ப்ரியதர்ஷன் இயக்கத்தில் மோகன்லால் நடித்துள்ள “மரக்கார்: அரபிகடலின்டே சிம்ஹம் படத்தில் நடித்து முடித்துள்ளார். இப்படத்தைத் தொடர்ந்து வினித் ஸ்ரீனிவாசன் இயக்கும் புதுப்படத்தில் கீர்த்தி சுரேஷ் தான் கதாநாயகி என்று சொல்லப் படுகிறது. அந்த படத்தில் மோகன்லாலின் மகன் பிரனவ் தான் ஹீரோ. “மரக்கார்” படத்தில் பிரனவ் சிறு வயது மோகன்லாலாக நடித்திருக்கிறார். ஆனால் அவரும், கீர்த்தியும் எந்த ஒரு காட்சியிலும் இனைந்து நடிக்கவில்லை.

வினித் ஸ்ரீனிவாசன் படங்களுக்கு மலையாள ரசிகர்களிடையே நல்ல வரவேற்பு உள்ளது. வினித் தற்போது பிரனவ் மோகன்லாலை வைத்து எடுக்க உள்ள படத்தின் ஷூட்டிங் அடுத்த ஆண்டு துவங்க உள்ளதாக செய்திகள் வந்துள்ளன. இந்த நிலையில் கீர்த்தி சுரேஷ் தமிழ் திரையுலகில் அறிமுகமாகி இந்த மாதத்துடன் 4 ஆண்டுகள் நிறைவடைந்துள்ளது. இதை அவரது ரசிகர்கள் #4YearsOfKeerthySuresh என்ற ஹேஷ்டேகுடன் ட்விட்டரில் கொண்டாடிக் கொண்டிருக்கிறார்கள். மீண்டும் தமிழில் எப்போது படம் நடிப்பார் என்பது கேள்விக் குறியாகவே உள்ளது.