தல 60 பெயரில் இப்படியொரு மோசடியா? உஷாரான போனி கபூர் ட்விட்டரில் லீகல் நோட்டீஸ்!

இயக்குநர் ஹெச் வினோத், தயாரிப்பாளர் போனி கபூர் ஆகியோரது காம்பினேசனில் தல அஜித் நடித்த படம் நேர்கொண்ட பார்வை. பெண்களை மையப்படுத்திய இப்படம், விமர்சன ரீதியாகவும், வசூல் ரீதியாகவும் நல்ல வரவேற்பு பெற்றது. இப்படத்தைத் தொடர்ந்து மீண்டும் அஜித், ஹெச் வினோத், போனி கபூர் கூட்டணியில் இணைந்துள்ளார்.

இந்த கூட்டணியில் தல60 படம் உருவாக இருக்கிறது. கடந்த ஆகஸ்ட் மாதத்தின் இறுதியில், இப்படத்திற்கு பூஜை போடப்படும் என்று கூறப்பட்டது. ஆனால், பூஜை நடந்ததா? இல்லையா? என்பது குறித்து எந்த தகவலும் இல்லை. எனினும், அஜித் தல60 படத்தின் படப்பிடிப்பில் கலந்து கொண்டார் என்றும், அதற்குரிய புகைப்படம் சமூக வலைதளங்களில் வெளியானது என்றும் கூறப்பட்டது. இந்த நிலையில், வரும் டிசம்ம்பர் மாதம் இப்படத்தின் படப்பிடிப்பு தொடங்கப்பட இருக்கிறது என்று சினிமா விமர்சகர் ரமேஷ் பாலா தனது ட்விட்டரில் பதிவிட்டிருந்தார்.


தல 60 படத்திற்கான நடிகர்கள், நடிகைகள் குறித்து எந்த தகவலும் வெளியாகவில்லை. இந்த நிலையில், மோசடி கும்பலைச் சேர்ந்த சிலர் தல 60 பெயரில், இப்படத்தில் நடிப்பதற்கு நடிகர், நடிகைகள் தேர்வு நடந்துவருவதாக கூறிமோசடி செய்து வருகின்றனர். மேலும், சமூக வலைதளங்களில் போலியான தகவல்களும் அனுப்பப்பட்டு வருகின்றன.

இந்த நிலையில், இது குறித்து தகவலறிந்த போனி கபூர், இது போன்று யாருக்கும் அதிகாரம் வழங்கவில்லை என்றும், போலியான நபர்களிடம் யாரும் ஏமாற வேண்டாம் என்று தெரிவித்துள்ளார். அப்படி யாரேனும் நம்பி ஏமாந்து போனால், நாங்கள் பொறுப்பு கிடையாது என்று திட்டவட்டமாக தெரிவித்துள்ளார். இது குறித்து தனது ட்விட்டர் பக்கத்தில் சட்டரீதியாகவும் நோட்டீஸ் பதிவிட்டுள்ளார் என்பது குறிப்பிடத்தக்கது.