'மாநாடு' வெளியீட்டில் உதயநிதி ஸ்டாலின் தலையீடு இருந்ததா..?: கே. ராஜன் பதில்!

'மாநாடு' சிம்புவின் மிகப்பெரிய கம்பேக் படமாக அமைந்துள்ளது. சுரேஷ் காமாட்சி தயாரிப்பில், வெங்கட் பிரபு இயக்கத்தில் உருவான இந்தப்படத்தின் ரிலீசுக்காக வெகு நாட்களாக ரசிகர்கள் காத்திருந்தினர். பலவித தடைகளுக்கு மத்தியில் கடந்த வியாழக்கிழமை திரையரங்குகளில் வெளியாகியுள்ள இந்தப்படம் ரசிகர்களிடம் அமோக வரவேற்பினை பெற்று வருகிறது.

'மாநாடு' படம் கடந்த தீபாவளிக்கு வெளியாக உள்ளதாக படக்குழுவினர் அறிவித்தனர். தீபாவளியன்று 'அண்ணாத்த' படமும் வெளியாக இருந்ததால் ரசிகர்கள் மத்தியில் பெரும் எதிர்பார்ப்பு ஏற்பட்டது. ஆனால் தீபாவளிக்கு முன்பாக 'மாநாடு' படத்தின் ரிலீஸ் நவம்பர் 25 ஆம் தேதி மாற்றியுள்ளதாக படக்குழுவினர் அறிவித்தனர். இதனிடையில் ரிலீசுக்கு முன்தினமும் படம் நாளை வெளியாகாது என வருத்தத்துடன் தெரிவித்திருந்தார் தயாரிப்பாளர் சுரேஷ் காமாட்சி.

'மாநாடு' படம் தொடர்ச்சியாக தள்ளி போவது ரசிகர்கள் மத்தியில் அதிர்ச்சியை ஏற்படுத்தியது. இதில் அரசியல் குறுக்கீடு உள்ளதாகவும் சர்ச்சைகள் எழுந்தது. இந்நிலையில் இந்த விவகாரம் தொடர்பாக சமயம் தமிழுக்கு பேட்டியளித்த பிரபல தயாரிப்பாளர் கே.ராஜன் பைனான்ஸ் காரணமாகவே 'மாநாடு' ரிலீஸ் தள்ளி போவதாக தயாரிப்பாளர் சுரேஷ் காமாட்சி அறிவித்ததாக தெரிவித்துள்ளார்.
'மாநாடு சக்சஸ் பார்ட்டி.. வெங்கட் பிரபு எங்கே?: ரசிகர்கள் கேள்வி!
'மாநாடு' ரிலீஸ் விவகாரத்தில் அரசியல் தலையீடு எதுவும் இல்லை என்றும், உதயநிதி ஸ்டாலினால் படம் தள்ளி போவதாக சமூக வலைத்தளத்தில் பரவிய தகவல்கள் வதந்தி என்றும் தெரிவித்துள்ளார். மேலும் முதலமைச்சர் மு.க. ஸ்டாலின் இந்த மாதிரியான விவகாரத்தில் தலையீடு செய்வதில்லை என்றும் தெரிவித்துள்ளார்.

மேலும் கொரோனா தடுப்பூசி போட்டவர்கள் மட்டுமே திரையரங்கில் அனுமதி என முதலமைச்சர் அறிவித்ததால் படத்தின் வசூலில் எதுவும் பாதிப்பு ஏற்படுமா என கேட்கப்பட்டதுக்கு, தமிழ்நாடு அரசு மக்களின் நலனுக்காகவே இந்த அறிவிப்பை வெளியிட்டுள்ளதாகவும், இதனால் படத்தின் வசூலில் பாதிப்பு எதுவும் ஏற்படாது என்றும் தெரிவித்துள்ளார்.

'மாநாடு' படத்தில் சிம்புவிற்கு ஜோடியாக கல்யாணி நடித்துள்ளார். இவர்களுடன் எஸ்ஏ சந்திரசேகர், பாரதிராஜா, எஸ்.ஜே.சூர்யா, பிரேம்ஜி, அரவிந்த் ஆகாஷ், ஒய்.ஜி.மகேந்திரன், வாகை சந்திர சேகர், டேனியல் பாலாஜி, மனோஜ், பிரேம்ஜி, உதயா மற்றும் கருணாகரன் உள்ளிட்ட நட்சத்திர பட்டாளங்களே இந்தப்படத்தில் நடித்துள்ளனர். கடந்த வியாழக்கிழமை திரையரங்கில் வெளியான 'மாநாடு' படம் திரையிட்ட இடங்களில் எல்லாம் வசூல் சாதனை படித்து வருவது குறிப்பிடத்தக்கது.