விஜய்க்கு நன்றி கூறிய புதுச்சேரி முதல்வர்: வைரல் வீடியோ

கொரோனா வைரஸ் பிரச்சனையை சமாளிக்க மத்திய அரசு மற்றும் மாநில அரசுகள் தீவிர முயற்சிகள் எடுத்து வருகின்றன. அதற்க்காக சினிமா நடிகர்கள் உட்பட பலரும் நிதி உதவியை வழங்கி வருகின்றனர்.

நேற்று நடிகர் விஜய் மொத்தம் 1.3 கோடி ரூபாய் கொரோனா நிவாரண நிதியாக வழங்கினார். அதை அவர் தென்னிந்தியாவின் அனைத்து மாநிலங்களுக்கும் பிரித்து கொடுத்துள்ளார். மத்திய அரசுக்கு 25 லட்சம், தமிழக முதல்வர் நிவாரண நிதிக்கு 50 லட்சம், FEFSI சங்கத்திற்கு 25 லட்சம் கொடுத்துள்ளார்.

கேரளாவுக்கு 10 லட்சம், கர்நாடகாவிற்கு 5 லட்சம், ஆந்திராவிற்கு 5 லட்சம், தெலுங்கானாவிற்கு 5 லட்சம் மற்றும் புதுச்சேரி முதலமைச்சர் நிவாரண நிதிக்கு 5 லட்சம் ரூபாய் வழங்கியுள்ளார் விஜய்.

இதற்காக பல்வேறு தரப்பினரும் விஜய்க்கு பாராட்டு தெரிவித்து வருகின்றனர். புதுச்சேரியின் முதல்வர் வி.நாராயணசாமி விஜய்க்கு நன்றி கூறி வீடியோ ஒன்றை வெளியிட்டுள்ளார்.


"புதுச்சேரி முதலமைச்சர் நிவாரண நிதிக்கு மக்கள் தாராளமாக நிதி வழங்க வேண்டும் என நான் கேட்டுக்கொண்டேன். கோரோனா தடுப்பு உபகரணங்கள் வாங்குவதற்கு தான் இதை நான் கேட்டுக்கொண்டேன். புதுச்சேரியில் பல நடிகர்கள் வந்து படங்களில் நடிக்கிறார்கள். தயாரிப்பாளர்கள் வருகிறார்கள். படம் எடுப்பதற்கு ஏதுவான சூழ்நிலை இருப்பதால் நிறைய வருகிறார்கள். அவர்களுக்கும் புதுச்சேரிக்கு உதவ வேண்டிய கடமை இருக்கிறது. அதை உணர்ந்து விஜய் 5 லட்சம் கொடுத்துள்ளார்."

"புதுச்சேரி மக்களுக்கு கொடுக்க வன்னெடும் என்கிற இந்த தாராளமான மனம் இருப்பதை நான் வரவேற்கிறேன். அவருக்கு நன்றியை தெரிவித்து கொள்கிறேன். அதே போல மற்ற நடிகர்களும் முன்வந்து தாராளமாக நிதி உதவி தர முன்வரவேண்டும்" என அவர் கேட்டுக்கொண்டுள்ளார்.