Robot 2.0 Collections: வசூலில் புதிய உச்சம்; முதல் நாளிலேயே ரூ.100 கோடி வசூலை ஈட்டுமா 2.0!

தமிழில் பிரம்மாண்ட இயக்குநர் ஷங்கரின் 2.0 படம் உலகம் முழுவதும் இன்று வெளியாகியுள்ளது. இதில் உச்ச நட்சத்திரங்களான ரஜினிகாந்த், அக்‌ஷய் குமார், ஏ.ஆர்.ரகுமான், லைகா புரொடக்‌ஷன்ஸ் ஆகியோர் கைகோர்த்துள்ளனர்.

இந்தியாவிலேயே அதிக பொருட்செலவில் எடுக்கப்பட்ட படம் என்று இயக்குநர் ஷங்கர் தெரிவித்துள்ளார். இதன் மதிப்பு சுமார் ரூ.500 கோடியைத் தாண்டியுள்ளது. படம் வெளியாவதற்கு முன்பே, விநியோக உரிமை, சாட்டிலைட் உரிமம் என ரூ.100 கோடிக்கும் அதிகமாக வசூலை ஈட்டியுள்ளது.

இந்நிலையில் முதல் நாள் வசூலில் 2.0 படம் புதிய சாதனை படைக்குமா என்று எதிர்பார்ப்பு கிளம்பியுள்ளது. இப்படம் உலகம் முழுவதும் 10,000 திரையரங்குகளில் வெளியாகிறது. இது பாகுபலி 2 படத்தின் 9,000 திரையரங்குகள் வெளியீட்டு சாதனையை முறியடித்துள்ளது.

இந்தியாவில் மட்டும் 32,000 முதல் 33,000 ஷோக்கள் திரையிடப்படும் என்று கூறப்பட்டுள்ளது. முதல் நாளான இன்று பல்வேறு நகரங்களில் முதல் காட்சி அதிகாலை 4 மணிக்கே ஒளிபரப்பப் பட்டுள்ளது. ஆகையால் இந்தியாவில் முதல் நாள் வசூல் ரூ.70 கோடியை எட்டும் என்று கூறப்படுகிறது.

உலகம் முழுவதும் கணக்கிடுகையில் முதல் நாள் வசூல் ரூ.100 கோடியைத் தாண்டும் என்று கணிக்கப்பட்டுள்ளது. இதற்கு முன்பு அமிர் கானின் தக்ஸ் ஆப் இந்துஸ்தான் படம் முதல் நாளில் ரூ.50.75 கோடி வசூலித்ததே சாதனையாக உள்ளது.