மக்கள் மன்றத்தை கலைத்த கையோடு மேற்கு வங்கம் செல்லும் ரஜினி: எதுக்குன்னு தெரியுமா..?

சன் பிக்சர்ஸ் தயாரிப்பில் ரஜினிகாந்த் நடிக்கும் 'அண்ணாத்த' திரைப்படத்தை இயக்கி வருகிறார் சிறுத்தை சிவா. இந்த படத்தில் ரஜினிகாந்திற்கு ஜோடியாக நடிக்கிறார் நயன்தாரா. இவர்களுடன் குஷ்பு, மீனா, கீர்த்தி சுரேஷ், சூரி, சதீஷ், ஜகபதி பாபு உள்ளிட்டோர் நடித்து வருகின்றனர். வெற்றி ஒளிப்பதிவு செய்யும் இந்தப் படத்துக்கு டி.இமான் இசையமைக்கிறார். இந்நிலையில் 'அண்ணாத்த' திரைப்படத்தின் இறுதிக்கட்ட படப்பிடிப்பு நாளை துவங்க உள்ளதாக தகவல்கள் வெளியாகியுள்ளன.

அண்ணாத்த திரைப்படத்தை இந்த ஆண்டு பொங்கலுக்கு வெளியிட திட்டமிட்டிருந்தனர் படக்குழுவினர். ஆனால் கொரோனா அச்சம் காரணமாக திட்டமிட்டபடி படப்பிடிப்பு நடத்த இயலவில்லை. இந்நிலையில் தற்போது ஏற்பட்டுள்ள கொரோனா இரண்டாவது அலையின் தீவிரத்துக்கு முன்னதாகவே அண்ணாத்த திரைப்படத்தின் பெரும்பாலான காட்சிகளை எடுத்து முடித்துவிட்டது படக்குழு.

இன்னும் ஒருசில காட்சிகள் மட்டுமே படமாக்கப்பட வேண்டியுள்ளது. அண்மையில் தான் மருத்துவ பரிசோதனைக்காக அமெரிக்கா சென்றார் ரஜினிகாந்த். அவர் சென்னை திரும்பியவுடன் அண்ணாத்த திரைப்படத்தின் படப்பிடிப்பு துவங்கும் என எதிர்பார்க்கப்பட்டது. இந்நிலையில் இறுதிகட்ட படப்பிடிப்பிற்காக அண்ணாத்த படக்குழு மேற்கு வங்கம் செல்ல இருப்பதாக தற்போது தகவல்கள் வெளியாகியுள்ளன.

பாக்சிங் என்ன உன் அப்பன் வீட்டு சொத்தா?: வெளியானது சார்பட்டா பரம்பரை டிரெய்லர்!
இன்னும் 20 நாட்கள் படத்தின் படப்பிடிப்பு நடத்த வேண்டி உள்ளதால் நாளை முதல் அண்ணாத்த படத்தின் படப்பிடிப்பு துவங்க இருப்பதாக கூறப்படுகிறது. இதில் ரஜினி நடிக்கவுள்ள காட்சிகள் நான்கு நாட்கள் படமாக்கப்பட உள்ளன. அதன்பிறகு ரஜினி சென்னை திரும்புவார் என எதிர்பார்க்கப்படுகிறது.

இந்நிலையில், அண்ணாத்த திரைப்படத்தின் ரிலீஸ் தேதியை படக்குழுவினர் அண்மையில் அறிவித்தனர். இந்த ஆண்டு தீபாவளியை முன்னிட்டு 4.11.2021 அன்று அண்ணாத்த திரைப்படம் திரையரங்குகளில் வெளியாகும் என்றும், விரைவில் படத்தின் பர்ஸ்ட் லுக் வெளியாகும் என்றும் அறிவித்திருந்தனர். தற்போது துவங்கவுள்ள இறுதிக்கட்ட படப்பிடிப்பு முடிந்தவுடன் படத்தின் பர்ஸ்ட் லுக் வெளியாகும் என எதிர்பார்க்கப்படுகிறது.