கடைசி நேரத்தில் மனம் மாறிய ரஜினி: புது திட்டம் என்ன தெரியுமா?

லாக்டவுனுக்கு முன்பு சிறுத்தை சிவா இயக்கத்தில் அண்ணாத்த படத்தில் நடித்து வந்தார் ரஜினிகாந்த். ஹைதராபாத்தில் இருக்கும் ராமோஜிராவ் ஃபிலிம் சிட்டியில் நடந்து வந்த படப்பிடிப்பின்போது ரஜினி தொடர்பான 60 சதவீத காட்சிகள் படமாக்கப்பட்ட நிலையில் கொரோனா வைரஸ் பிரச்சனை விஸ்வரூபம் எடுத்தது.

இதையடுத்து படப்பிடிப்பை நிறுத்தினார்கள். பல மாதங்களாக நிறுத்தி வைக்கப்பட்ட படப்பிடிப்பை கடந்த அக்டோபர் மாதம் துவங்க திட்டமிட்டார்கள். ஆனால் தன்னால் தற்போதைக்கு வர முடியாது, அடுத்த ஆண்டு ஜனவரி மாதம் தான் படப்பிடிப்பில் கலந்து கொள்ள முடியும் என்று ரஜினி தெரிவித்தார்.

மீண்டும் மனம் மாறிய ரஜினி: இப்ப வரலயாம் கண்ணா

பின்னர் தன் மனதை மாற்றிக் கொண்டு அக்டோபர் மாதமே படப்பிடிப்புக்கு வருவதாக கூறினார் ரஜினி. ஆனால் கொரோனா நேரத்தில் பயணம் செய்வதும், படப்பிடிப்பில் கலந்து கொள்வதும் பாதுகாப்பு இல்லை என்று நண்பர்கள் வலியுறுத்தவே மீண்டும் மனம் மாறினார். இதையடுத்து படப்பிடிப்பை மீண்டும் துவங்கும் திட்டத்தை கைவிட்டனர்.

அண்ணாத்த படத்திற்காக ராமோஜிராவ் ஃபிலிம் சிட்டியில் செட் அமைக்கும் பணி நடந்து வருகிறது. வரும் 15ம் தேதி படப்பிடிப்பை துவங்குகிறார்கள். இந்த மாதம் படப்பிடிப்பை துவங்கினாலும் ரஜினி ஐனவரியில் தான் கலந்து கொள்வார் என்று கூறப்பட்டது.

தற்போது நயன்தாரா, கீர்த்தி சுரேஷ் தொடர்பான காட்சிகளை படமாக்கப் போகிறார் சிவா என்று தகவல் வெளியானது. இந்நிலையில் டிசம்பர் 15ம் தேதியே படப்பிடிப்பில் கலந்து கொள்வது என்று முடிவு செய்துள்ளாராம் ரஜினி.

அவருக்கு அரசியல் வேலை எக்கச்சக்கமாக இருபப்தால் ஒரே ஷெட்யூலில் படப்பிடிப்பை முடிக்கப் போகிறார்களாம். ஹைதராபாத்தில் இருந்தாலும் போன் மற்றும் வீடியோ கால் மூலம் அரசியல் வேலையையும் பார்க்கப் போகிறாராம் ரஜினி.

சன் பிக்சர்ஸ் நிறுவனம் தயாரித்து வரும் அண்ணாத்த படத்தில் குஷ்பு, மீனா, பிரகாஷ் ராஜ், சூரி, சதீஷ் உள்ளிட்டோர் முக்கிய கதாபாத்திரங்களில் நடிக்கிறார்கள். படத்திற்கு டி. இமான் இசையமைக்கிறார்.

அண்ணாத்த படம் குறித்து சிவா எந்த அப்டேட்டும் தருவது இல்லை. அப்டேட் கேட்டுக் கேட்டு ரஜினி ரசிகர்கள் ஓய்ந்துவிட்டனர். அவர்களை பார்த்து அஜித் ரசிகர்கள் பரிதாபப்படுகிறார்கள். சிவா இப்படித் தான், அவரின் அப்டேட் எல்லாம் எதிர்பார்க்காதீர்கள் என்று அஜித் ரசிகர்கள் தெரிவித்துள்ளனர்.