மீண்டும் தள்ளிப் போகும் ரஜினியின் 2.0; ஏமாற்றத்தில் ரசிகர்கள்!

சென்னை: ரஜினிகாந்தின் 2.0 திரைப்படம் மீண்டும் தள்ளிப் போவதாக தகவல்கள் வெளியாகியுள்ளன.

ஷங்கர் இயக்கத்தில் ரஜினிகாந்த் நடிப்பில் ரூ.450 கோடி பட்ஜெட்டில் உருவாகி வரும் திரைப்படம் ‘2.0’. இது இந்தியாவில் அதிக பொருட்செலவில் தயாராகி வரும் படம் என்ற பெருமையை பெற்றுள்ளது.

கடந்த 2015ஆம் ஆண்டு முதல் பட வேலைகள் தொடங்கப்பட்டன. ஓராண்டிற்கு முன்பே படப்பிடிப்பு பணிகள் முடிவடைந்து விட்டன. கடந்த டிசம்பர் மாதம் 2.0 படத்தின் பாடல் வெளியீட்டு விழா, துபாயில் நடத்தப்பட்டது.

இதையடுத்து ஏப்ரல் 2018ல் படத்தை வெளியிடத் திட்டமிடப்பட்டது. ஆனால் வெளியீடு திடீரென தள்ளிப் போனது. கடந்த மே மாதத்திலும் வெளிவரவில்லை. இந்நிலையில் ஜூன் 7ஆம் தேதி ரஜினிகாந்தின் ‘காலா’ திரைப்படம் வெளியானது.

இதனால் இம்மாதமும் வெளியாக வாய்ப்பில்லை. இதற்கிடையில் ஆகஸ்ட் 15ஆம் தேதி வெளியிடத் திட்டமிடப்பட்டது. ஆனால் அடுத்த ஆண்டு ஏதேனும் ஒரு பண்டிகை நாளில் ‘2.0’ வெளியாகும் என்று தகவல்கள் கசிந்துள்ளன.

இது நீண்ட எதிர்பார்ப்புடன் காணப்படும் ரசிகர்கள் மத்தியில் பெரும் ஏமாற்றத்தை அளித்துள்ளது.

Rajinikanth fans disappointed about 2.0 movie again postponed.