Rajinkanth நல்ல மாமனார், நல்ல மருமகன்: நீங்களே என்னன்னு பாருங்க

வெற்றிமாறன் இயக்கத்தில் தனுஷ் நடித்த அசுரன் படம் 100 நாட்களை தாண்டி வெற்றிகரமாக ஓடிக் கொண்டிருக்கிறது. இந்நிலையில் அசுரன் வெற்றிக் கொண்டாட்ட நிகழ்ச்சி சென்னையில் நடைபெற்றது. அந்த நிகழ்ச்சியில் வெற்றிமாறன், தனுஷ், படத்தின் தயாரிப்பாளரான கலைப்புலி எஸ் தாணு, ஜிவி பிரகாஷ் குமார் உள்ளிட்டோர் கலந்து கொண்டு பேசினார்கள்.

தயாரிப்பாளர் தாணு பேசியபோது, சிவாஜி சாருக்குப் பிறகு தனுஷின் நடிப்பு பிரம்பிக்க வைக்கிறது. கேரளாவில் படம் பார்த்த அத்தனை பெரிய நடிகர்களும் ஒரே வார்த்தையில் தனுஷை தவிர யாராலும் இப்படத்தில் நடிக்க முடியாது என்றார்கள். நடிகர் திலகத்திற்குப் பிறகு தனுஷ் தான். ரஜினியிடம் நான் இந்தப்புள்ள நமக்கு கிடைத்த பொக்கிசம் என்றேன். அவரும் தனுஷ் கால்களில் விழும் சீனில் நானே நடிக்கலாமா என்று நினைத்தேன் என்றார் என கூறினார்.

தனுஷின் அசுரன் படம் ரஜினிக்கு இந்த அளவுக்கு பிடித்துள்ளது என்பது தாணு சொல்லித் தான் தெரிய வந்துள்ளது. ரஜினி தன் மருமகனை தனியாக அழைத்து பாராட்டியிருப்பார். ஆனால் அவரே அசுரன் படத்தில் நடிக்க விரும்பியது பலரையும் வியக்க வைத்துள்ளது. இதில் வியப்பு என்னவென்றால் தனுஷுக்கு ரஜினி படத்தில் நடிக்க ஆசை. ரஜினிக்கோ தனுஷின் கதாபாத்திரத்தில் நடிக்க ஆசை. ரஜினியுடன் சேர்ந்து நடிக்க வேண்டும் என்கிற தனுஷின் ஆசை இந்த ஆண்டாவது நிறைவேறுமா என்பதை பொறுத்திருந்து பார்ப்போம்.

ஒரு சூப்பர் ஸ்டாரின் மருமகனாக இருந்தும் அதையும் தாண்டி தனது நடிப்புக்காக மட்டுமே அதிகம் பேசப்படுபவர் தனுஷ். நடிப்பு ராட்சசன் என்று தனக்கென்று ஒரு அடையாளத்தை ஏற்படுத்தியுள்ளது சாதாரண விஷயம் அல்ல. அசுரன் படத்தை பார்த்தவர்கள் இனியும் தனுஷை இப்படி இயக்க ஆள் இல்லை என்று தெரிவித்துள்ளனர். அந்த அளவுக்கு நடிப்பால் மிரட்டியுள்ளார்.