'கபாலி' புரட்சிகர படம்: ரஜினி மகிழ்ச்சி..!

சென்னை: புரட்சிகர படமான 'கபாலி' திரைப்படத்தை வெற்றி பெறச் செய்த ரசிகர்களுக்கும், படக் குழுவினருக்கும் சூப்பர் ஸ்டார் ரஜினிகாந்த் தனது நன்றியைத் தெரிவித்துள்ளார்.

இது குறித்து சூப்பர்ஸ்டார் ரஜினிகாந்த் தனது கைப்பட எழுதி வெளியிட்டுள்ள அறிக்கையில்,'புரட்சிகரமான, உணர்ச்சிகரமான, வித்தியாசமான படம் கபாலி. கபாலி படத்தில் ஓய்வில்லாமல் நடித்ததன் காரணமாக உடலுக்கும், மனதிற்கும் ஓய்வு தேவைப்பட்டது. அதையொட்டி, 2 மாதம் அமெரிக்காவில் எனது மூத்த மகள் ஐஸ்வர்யாவுடன் ஓய்வெடுத்தும், மருத்துவ பரிசோதனை செய்துகொண்டும், நலமாகவும், ஆரோக்கியமாகவும், உற்சாகத்துடனும் தாய்நாடு திரும்பினேன்' என கூறியுள்ளார்.
மேலும், ''கபாலி' வெற்றிச் செய்தியை அமெரிக்காவில் கேள்விபட்டதை இன்று நேரடியாக பார்த்து உணர்ந்து மிகுந்த மகிழ்ச்சியில் இருக்கிறேன். இப்படத்தின் தயாரிப்பாளர் கலைப்புலி.எஸ்.தாணு, இயக்குனர் பா.ரஞ்சித் உள்ளிட்ட கபாலி படக்குழுவினருக்கும், சக நடிகர்களுக்கும் நன்றி, ரசிகர்கள் உட்பட அனைவருக்கும் தலைவணங்கி மனமார்ந்த நன்றி- மகிழ்ச்சி' என தனது அறிக்கையில் சூப்பர்ஸ்டார் கூறியுள்ளார்.

இதைத் தொடர்ந்து விரைவில் பிரம்மாண்ட இயக்குனர் ஷங்கரின் 'எந்திரன் 2.0' படத்தின் அடுத்தக்கட்ட படப்பிடிப்பில் இணைவார் என எதிர்ப்பார்க்கப்படுகிறது.