ரஜினியின் தர்பார்
ரஜினிகாந்த் பல ஆண்டுகள் கழித்து போலீஸ் அதிகாரியாக நடித்த தர்பார் படம் ரசிகர்களுக்கு பிடித்துள்ளது. ஏ. ஆர். முருகதாஸ் ரஜினி ரசிகர்களை மனதில் வைத்து தான் படத்தை இயக்கினார், அதில் அவர் வெற்றியும் கண்டுள்ளார். தர்பார் படத்தில் அது சரியில்லை, இது சரியில்லை என்று விமர்சிப்பவர்கள் விமர்சித்தாலும் தியேட்டருக்கு செல்பவர்கள் சென்று கொண்டு தான் இருக்கிறார்கள். அது தர்பார் வசூலில் இருந்து நன்றாகத் தெரிகிறது.
வசூல் விபரம்
தர்பார் படம் ரிலீஸான அன்று இந்தியாவில் மட்டும் ரூ. 36 கோடி வசூல் செய்தது. இந்நிலையில் படத்தின் நான்காவது நாள் வசூல் விபரம் வெளியாகத் துவங்கியுள்ளது. தர்பார் கடந்த நான்கு நாட்களில் சென்னையில் மட்டும் ரூ. 7.28 கோடி வசூல் செய்துள்ளது. சென்னை பாக்ஸ் ஆபீஸில் தர்பார் வசூல் வேட்டை நடத்திக் கொண்டிருக்கிறது என்பதில் சந்தேகமே இல்லை.
வெளிநாடுகள்
தர்பார் படம் கடந்த 4 நாட்களில் ஆஸ்திரேலியாவில் ரூ. 1.99 கோடியும், அமெரிக்காவில் ரூ. 1 கோடியும் வசூல் செய்துள்ளது. இங்கிலாந்தில் மூன்று நாட்களில் ரூ. 1.88 கோடியும், ஐக்கிய அரபு அமீரகத்தில் ரூ. 6 கோடியும் வசூலித்துள்ளது. இது தவிர மலேசியா மற்றும் சிங்கப்பூரிலும் தர்பார் நல்ல வசூல் செய்து கொண்டிருக்கிறது.
ரசிகர்கள்
தர்பார் படம் ரிலீஸான சில மணிநேரத்தில் தமிழ் ராக்கர்ஸில் கசிந்தது. இருப்பினும் அதனால் வசூல் பெரிதாக பாதிக்கப்படவில்லை. தர்பார் ஆன்லைனில் கசிந்தாலும் நாங்கள் மீண்டும் மீண்டும் படத்தை பார்த்து வெற்றியடையச் செய்வோம் என்று ரஜினி ரசிகர்கள் தெரிவித்தார்கள். சொன்னதோடு மட்டும் அல்லாமல் ஒரே நாளில் 3 காட்சிகள் எல்லாம் பார்க்கிறார்கள்.