இருக்கு, இன்று ரஜினியிடம் இருந்து முக்கிய அறிவிப்பு இருக்கு?

ரஜினிகாந்த் கட்சி துவங்கி, சட்டசபை தேர்தலில் போட்டியிடுகிறோம் கண்ணா என்று அறிவிப்பு வெளியிட்டு 2 ஆண்டுகள் ஆகிவிட்டது. அவரோ கட்சி துவங்கும் வேலையை ஆரம்பிக்காமல் தொடர்ந்து படங்களில் நடித்துக் கொண்டிருக்கிறார். ரஜினி கட்சியும் துவங்கப் போவது இல்லை, அரசியலுக்கு வரப் போவதும் இல்லை என்று பேச்சு கிளம்பியுள்ளது. இந்நிலையில் ரஜினி நடித்துள்ள தர்பார் படத்தின் இசை வெளியீட்டு விழா இன்று நடைபெறுகிறது.

தர்பார் இசை வெளியீட்டு விழாவில் தனது அரசியல் பயணம் குறித்த அறிவிப்பை ரஜினி வெளியிடுவார் என்று எதிர்பார்க்கப்படுகிறது. அதே சமயம் பொடி வைத்து பேசிவிட்டு, இது பட விழா மேடை, அரசியல் விழா அல்ல என்று ரஜினி தெரிவிக்கவும் வாய்ப்பு உண்டு. இருப்பினும் அரசியலுக்கு வருவது பற்றி ரஜினி தீர்க்கமாக ஒரு முடிவை எடுத்தால் நல்லது என்று விமர்சனம் எழுந்துள்ளது. இன்றைய விழா பட விழா என்பதை தாண்டி பெரிய அறிவிப்பு வரும் விழா என்று கருதப்படுகிறது.

ரஜினி கடந்த வாரம் தனது போயஸ் கார்டன் வீட்டில் வைத்து பீமரத சாந்தி யாகம் நடத்தியுள்ளார். இது அவர் அரசியலுக்கு வரும் நோக்கில் தான் நடத்தப்பட்டது என்று கூறப்படுகிறது. ஆனால் நீண்ட ஆயுளும், நினைத்தது நடக்கவும் அவர் யாகம் நடத்தியிருக்கிறார். அந்த நினைத்த காரியம் அரசியலாகக் கூட இருக்கலாம் அல்லவா என்று கூறப்படுகிறது. எது எப்படியோ, இன்று மாலை சஸ்பென்ஸ் உடைந்துவிடும்.

தர்பார் படத்தை அடுத்து ரஜினி சிறுத்தை சிவா இயக்கத்தில் தலைவர் 168 படத்தில் நடிக்கிறார். அதன் பிறகு அவர் கைதி படம் புகழ் லோகேஷ் கனகராஜ் இயக்கத்தில் நடிக்கப் போகிறாராம். அந்த படத்தை தயாரித்து ரஜினியுடன் சேர்ந்து நடிக்கிறார் கமல் ஹாஸன் என்று செய்திகள் வெளியாகியுள்ளன. இப்படி அடுத்தடுத்து படங்களில் நடிக்கும் ரஜினி எப்பொழுது கட்சி துவங்குவார் என்கிற கேள்வி எழுந்துள்ளது. அரசியலுக்கு வருவதும், வராததும் அவர் இஷ்டம். யாரையும் கட்டாயப்படுத்த உரிமை இல்லை என்பது குறிப்பிடத்தக்கது.