தமிழ் ராக்கர்ஸ்க்கு ஆப்பு வைத்த ரஜினியின் 2.0!

திருட்டுத்தனமாக படங்களை வெளியிடும் இணையதளமான தமிழ் ராக்கர்ஸ்க்கு ரஜினியின் 2.0 படம் தக்க பாடம் புகட்ட உள்ளது.

கபாலி படத்தைத் தொடர்ந்து தற்போது சூப்பர்ஸ்டார் தயாராகி வரும் படங்கள் ஷங்கரின் 2.0 மற்றும் பா.ரஞ்சித்தின் காலா. எந்திரன் படத்தின் 2ம் பாகமான 2.0 படத்தை லைக்கா புரோடக்ஷன் நிறுவனம் தயாரித்துள்ளது. ரஜினிக்கு ஜோடியாக எமி ஜாக்சன் நடித்துள்ளார். பாலிவுட் நடிகர் அக்சய் குமார் ரஜினிக்கு வில்லனாக நடித்துள்ளார். இசைப்புயல் ஏ.ஆர்.ரஹ்மான் படத்திற்கு இசையமைத்துள்ளார். சமீபத்தில் இயக்குனர் ஷங்கர் படத்தின் மேக்கிங் வீடியோ ஒன்றை வெளியிட்டார். அதற்கு ரசிகர்களிடையே நல்ல வரவேற்பு கிடைத்துள்ள நிலையில், 2வது மேக்கிங் வீடியோவையும் வெளியிட்டுள்ளார். கிட்டத்தட்ட ரூ.450 கோடியை தொட்டுவிட்ட 2.0 படத்தின் பட்ஜெட் பாகுபலி படத்தின் சாதனைகளை முறியடிக்கும் என்பதில் எந்தவித சந்தேகமும் இல்லை.

இந்நிலையில், திருட்டுத்தனமாக புதுப்படங்களை வெளியிடும் இணையதளமான தமிழ் ராக்கர்ஸ்க்கு சவால் விடும் வகையிலும், படத்தை திருட்டுத் தனமாக வெளியாவதை தடுக்கும் வகையிலும் இப்படம் உருவாக்கப்பட்டுள்ளது. ஆம், முதலில் 2.0 படத்தை 2டி மற்றும் 3டி ஆகிய வெர்ஷன்களில் திரையரங்குகளில் தன்மையைப் பொறுத்து வெளியிட திட்டமிட்டிருந்தது. ஆனால், தற்போது 3டி வெர்ஷன் மட்டுமே முதலில் வெளியிட படக்குழு முடிவு செய்துள்ளது தாம். இதன் பிறகு ஓரிரு வாரங்கள் கழித்த பின்பு படம் 2டி வெர்ஷனில் வெளியாகுமாம்.

2வது மேக்கிங் வீடியோவும் 3டியில் எப்படி உருவானது என்பதை எடுத்துக்காட்டுகிறது. இந்த 3டி வெர்ஷன் படத்தை திருட்டுத் தனமாக கேமராவில் பதிவு செய்து வெளியிடுவதை சரியான தரத்தை தராது. அப்படியே வெளியானாலும், அதனை ஆன்லைனிலோ அல்லது தொலைக்காட்சியிலோ படம் பார்க்கும் அனுபவம் என்பது 0 சதவீதமாகத் தான் இருக்கும் என்பது குறிப்பிடத்தக்கது. இப்படி ஒவ்வொரு படமும் வெளியானால், படம் திருட்டுத் தனமாக ஆன்லைனில் வெளியாவது தடுக்கப்படும்.

_{*Disclaimer: டைம்ஸ் ஆஃப் இந்தியா குழுமம் (சமயம்) திருட்டுதனமாக திரைப்படங்களை பதிவிறக்கம் செய்யும் இணையதளங்களை என்றுமே ஆதரிக்காது. இது செய்திக்காக மட்டுமே விளம்பரத்திற்கு அல்ல.}