ரஜினிக்காக உருவாக்கிய கதையில் நடிக்கும் விஜய்!!

நடிகர் விஜய் தற்போது ஏ.ஆர்.முருகதாஸ் இயக்கத்தில் நடித்து வரும் படம், ரஜினிக்காக உருவாக்கப்பட்டது என்ற தகவல் தற்போது வெளியாகி உள்ளது.

நடிகர் ரஜினி ‘கபாலி’ படத்திற்கு பின்பு, அடுத்து யாருடன் படம் நடிக்கலாம் என இருந்தபோது, வெற்றிமாறனிடமும் ஏ.ஆர்.முருகதாஸிடமும் கதைக் கேட்டுள்ளார். அதில், வெற்றிமாறன் கூறிய கதை மிக பிரம்மாதமாக இருந்துள்ளது. அந்தக் கதை எப்போது எடுத்தாலும் சூப்பர் ஹிட்டாகும் எனத் தெரிவித்துள்ளார்.

அதேவேளையில், ஏ.ஆர்.முருகதாஸ் கூறிய கதை அரசியல் களம் கொண்டதாகவும், தற்போதைய பிரச்சனைகளை மையமாக வைத்தும் இருந்தது. இதனால், ரஜினி அடுத்ததாக ஏ.ஆர்.முருகதாஸ் படத்தில் நடிப்பதாக ஒப்புக்கொண்டுள்ளார். அதன்பின், ஏ.ஆர்.முருகதாஸ் அந்தக் கதையை ரஜினியின் மாஸ் அப்பீலுக்கு ஏற்றவாறு மாற்றியுள்ளார்.

இதனிடையே, ஏ.ஆர்.முருகதாஸ் ‘ஸ்பைடர்’ படத்தின் பணிகளில் தீவிரமாக இருந்ததால், ரஜினி மீண்டும் பா.ரஞ்சித்துடன் இணைந்து ‘காலா’ படத்தை உருவாக்கியுள்ளார்.

இந்நிலையில், ஏ.ஆர். முருகதாஸ் தற்போது விஜய்யை வைத்து இயக்கி வரும் படம், ரஜினிக்காக அவர் எழுதிய கதை என்ற தகவல் வெளியாகி உள்ளது. இதனால், இப்படத்தில் அரசியல் அதிகம் இருக்கும் என எதிர்பார்க்கப்படுகிறது.