பொன்னம்பலத்தின் சிகிச்சைக்கு ரூ. 25,000 கொடுத்த எஸ்.வி. சேகர்

ஸ்டண்ட் கலைஞராக திரையுலகில் அறிமுகமான பொன்னம்பலம் பின்னர் வில்லனாக நடிக்கத் துவங்கினார். அவரின் தோற்றம் வில்லன் கதாபாத்திரத்திற்கு கச்சிதமாக பொருந்தியது. பல படங்களில் வில்லனாக நடித்து மிரட்டியிருக்கிறார். அவரின் இரண்டு சிறுநீரகங்களும் செயலலிழந்துவிட்டது. இதையடுத்து மருத்துவமனையில் அனுமதிக்கப்பட்ட பொன்னம்பலத்திற்கு உலக நாயகன் கமல் ஹாஸன் நிதியுதவி செய்தார்.

மேலும் பொன்னம்பலத்தின் இரண்டு பிள்ளைகளின் கல்விச் செலவையும் கமல் ஹாஸன் ஏற்றார். இதையடுத்து அவருக்கு சிறுநீரக மாற்று அறுவை சிகிச்சை செய்வதற்கான செலவை ரஜினிகாந்த் ஏற்றார். தங்கள் படங்களில் வில்லனாக நடித்த ஒருவருக்கு கமலும், ரஜினியும் முந்திக் கொண்டு உதவி செய்தது அனைவரையும் கவர்ந்தது.

பொன்னம்பலத்தின் சிறுநீரக மாற்று அறுவை சிகிச்சைக்கான செலவை ஏற்ற ரஜினி

இந்நிலையில் பொன்னம்பலம் பற்றி எஸ்.வி. சேகர் ஒரு ட்வீட் போட்டுள்ளார். அந்த ட்வீட்டில் அவர் கூறியிருப்பதாவது,

பிரபல ஸ்டண்ட் நடிகர் பொன்னம்பலம் கிட்னி செயலிழப்பால் டயாலிசிஸ் நிலையில் உள்ளார். என் டிரஸ்ட் மூலமாக ஒரு சிறு தொகை வழங்கியுள்ளேன். நல்ல மனம் படைத்தவர் அவருடைய வங்கி கணக்கில் பணம் அனுப்பி உதவலாம் என்று தெரிவித்து பொன்னம்பலத்தின் வங்கி கணக்கு விபரத்தை வெளியிட்டுள்ளார்.
பொன்னம்பலத்திற்கு எஸ்.வி. சேகர் ரூ. 25 ஆயிரம் கொடுத்திருக்கிறார். அவரின் ட்வீட்டை பார்த்தவர்கள் கூறியிருப்பதாவது,

தினமும் மது அருந்தி, புகைப்பிடித்ததால் தான் சிறுநீரகங்கள் பாதிக்கப்பட்டதாக பொன்னம்பலமே தெரிவித்தார். அவருக்கு எப்படி உதவி செய்வது?. அதற்கு பதில் யாராவது ஏழை குழந்தையின் படிப்புக்கு உதவலாம்.

உதவி செய்ததற்கு நன்றி எஸ்.வி. சேகர். பொன்னம்பலத்துடன் சேர்ந்து படங்களில் நடித்தவர்கள் உதவினால் நன்றாக இருக்கும். பொன்னம்பலத்திற்கு சிறுநீரக மாற்று அறுவை சிகிச்சை செய்யப் போவதாக சொன்னார்களே. நீங்கள் டயாலிசிஸ் என்கிறீர்கள். என்ன நடக்கிறது?.

மோடி ஆட்சியில் ஒரு நடிகரை கூட உங்களால் காப்பாற்ற முடியவில்லையே என்று தெரிவித்துள்ளனர்.

முன்னதாக பொன்னம்பலம் மருத்துவமனையில் ஆக்சிஜன் மாஸ்குடன் இருந்த புகைப்படங்கள் மற்றும் வீடியோ வெளியாகின. அதை பார்த்த ரசிகர்கள் பொன்னம்பலத்திற்காக ஃபீல் செய்தார்கள். சிலரோ, அது ஏன் தமிழகத்தில் பலருக்கு சிறுநீரக பிரச்சனை ஏற்படுகிறது என்று கேள்வி எழுப்பினார்கள்.

சென்னையில் கொரோனா வைரஸ் பிரச்சனையாக உள்ளது. பொன்னம்பலத்திற்கு ஏற்கனவே சிறுநீரக பிரச்சனை, இதில் கொரோனா வைரஸ் பாதிப்பு ஏற்படாமல் இருந்தால் சரி. அவர் பத்திரமாக இருக்க வேண்டிய நேரம் இது என்று சினிமா ரசிகர்கள் தெரிவித்துள்ளனர்.

படங்களில் ஹீரோக்களுக்கு தலைவலியாக இருந்த பொன்னம்பலம் கமல் தொகுத்து வழங்கிய பிக் பாஸ் நிகழ்ச்சியில் கலந்து கொண்டார். அங்கு அவர் பேசிய சில விஷயங்கள் சர்ச்சையானது.