வைரமுத்துவை விட்டால் ஆளே இல்லையா?: மணிரத்னம், ரஹ்மான் மீது ரசிகர்கள் கோபம்

கல்கியின் நாவலான பொன்னியின் செல்வனை படமாக எடுக்கிறார் இயக்குநர் மணிரத்னம் என்பது அனைவருக்கும் தெரியும். அந்த படத்திற்கு இசைப்புயல் ஏ.ஆர். ரஹ்மான் இசையமைக்கிறார். இந்நிலையில் பொன்னியின் செல்வன் படத்தில் 12 பாடல்கள் இருப்பதாகவும், அதை தான் எழுதுவதாகவும் வைரமுத்து பேட்டி ஒன்றில் தெரிவித்தார்.

பொன்னியின் செல்வனுக்காக மணிரத்னம்-ரஹ்மான்-வைரமுத்து கூட்டணி மீண்டும் அமைகிறது என்று அவர் மகிழ்ச்சியுடன் தெரிவித்தார். ஆனால் அவரின் அறிவிப்பை கேட்ட பலரும் அதிருப்தி அடைந்துள்ளனர்.

பாலியல் புகாரில் சிக்கிய வைரமுத்துவுடன் மணிரத்னமும், ஏ.ஆர். ரஹ்மானும் எப்படி வேலை செய்யலாம் என்று ரசிகர்கள் பலர் கேள்வி எழுப்பியுள்ளனர். பிரபல பாடகி சின்மயி வைரமுத்து மீது பாலியல் புகார் தெரிவித்தார் என்பது குறிப்பிடத்தக்கது.

புகார் தெரிவித்த சின்மயியை ஒதுக்கி வைத்துவிட்டு வைரமுத்துவுக்கு மட்டும் வேலை கொடுப்பது நியாயமே இல்லை என்று சமூக வலைதளங்களில் பலரும் கருத்து தெரிவித்துள்ளனர். பாலியல் புகாரில் சிக்கிய ஹாலிவுட் தயாரிப்பாளர் ஹார்வி வெயின்ஸ்டீனை திரையுலகினர் ஒதுக்கி வைத்தது போன்று வைரமுத்துவையும் ஒதுக்கி வைக்க வேண்டும் என்று சிலர் தெரிவித்துள்ளனர்.

மேலும் சிலர் கூறியிருப்பதாவது, வைரமுத்து எப்படிப்பட்டவர் என்பது திரைத்துறையில் உள்ள அனைவருக்கும் தெரியும். இது அனைவருக்கும் தெரிந்த ரகசியம் தான் என்று தனது சகோதரி ரிஹானா கூறிய பிறகும் ஏ.ஆர். ரஹ்மான் எப்படி அவருடன் வேலை செய்யலாம்?. பெண்கள் முன்னேற்றத்திற்கான சிங்கப் பெண்ணே பாடலில் வேலை செய்த ரஹ்மான் இப்படி பாலியல் புகாரில் சிக்கியவருடன் கூட்டணி வைப்பது வியப்பாக உள்ளது என்று தெரிவித்துள்ளனர்.

மணிரத்னம் இப்படி வைரமுத்துவை பாடல் எழுத வைத்துள்ளது அதிருப்தி அளிக்கிறது. அவர் உடனே வைரமுத்துவை நீக்க வேண்டும். இல்லை என்றால் இது தவறான முன்னுதாரணமாகிவிடும் என்று ரசிகர்கள் கவலை தெரிவித்துள்ளனர்.