என்ன ஒரு தைரியம்: மிக்சி, கிரைண்டர் உடன் கேக் வெட்டி கொண்டாடிய சர்கார் குழு!

தளபதி விஜய் நடிப்பில் உருவான சர்கார் படம் தீபாவளி பண்டிகையை முன்னிட்டு வெளியான நிலையில், தொடர்ந்து சர்ச்சையை சந்தித்து வருகிறது.

துப்பாக்கி மற்றும் கத்தி ஆகிய படங்களைத் தொடர்ந்து ஏ.ஆர்.முருகதாஸ் இயக்கத்தில் தளபதி விஜய் நடிப்பில் உருவான சர்கார் படம் தீபாவளி பண்டிகையை முன்னிட்டு கடந்த 6ம் தேதி வெளியாகி ரசிகர்களிடையே நல்ல வரவேற்பு பெற்று வருகிறது. அதோடு, வசூல் ரீதியாகவும் ரூ.200 கோடி வரை வசூல் குவித்துள்ளது.

இந்த நிலையில், இப்படத்தில் இலவசப் பொருட்கள் மற்றும் மறைந்த முன்னாள் முதல்வரின் இயற்பெயர் ஆகியவற்றை விமர்சனம் செய்யும் விதமாக காட்சி உருவாக்கப்பட்டிருந்தது என்று கூறி அதிமுகவினர் இடையே கடும் விமர்சனம் எழுந்தது. அதோடு, சர்கார் படத்திற்கு எதிர்ப்பு கிளம்பியது. மேலும், இயக்குனர் முருகதாஸ்க்கு எச்சரிக்கையும், படக்காட்சியையும் நீக்க வேண்டும் என்றும் பலரும் கோரிக்கை வைத்தனர்.

இந்த நிலையில், சர்ச்சைக்குரிய காட்சிகளை நீக்கியதன் காரணமாக அதிமுகவினர் நடத்திய போராட்டம் கைவிடப்பட்டது. இதற்கிடையில், படத்திற்கு என்ன தான் ஆளும் கட்சி சார்பில் தொடர்ந்து எதிர்ப்புகளும், போராட்டங்களும் நடந்து வரும் நிலையில், படத்தின் வசூலுக்கு மட்டும் எந்த பாதிப்பும் இல்லை. சர்கார் வெளியாகி 6 நாட்கள் ஆன நிலையில், படம் ரூ.200 கோடி வசூலைத் தாண்டியுள்ளது.

இதனை கொண்டாடும் விதமாக சர்கார் குழுவினர், சக்சஸ் மீட் நடத்தியுள்ளனர். இதில், ஏ.ஆர்.முருகதாஸ், விஜய், ஏ.ஆர்.ரஹ்மான், கீர்த்தி சுரேஷ், வரலட்சுமி சரத்குமார், பாடலாசிரியர் விவேக் ஆகியோர் பலர் கலந்து கொண்டனர். அப்போது படக்குழுவினர் கேக் வெட்டி சக்சஸ் மீட் கொண்டாடியுள்ளனர். அவர்கள் வெட்டிய கேக்கில், அதிமுக கொடுத்து வரும் இலவசப் பொருட்களான மிக்சி, கிரைண்டர், மின்விசிறி போன்ற பொருட்கள் இடம்பெற்றிருந்தது. இப்போது தான் ஒரு சர்ச்சை ஓய்ந்த நிலையில், கேக்கில் இலவசப் பொருட்களை இடம் பெறச் செய்துள்ளனர். என்னதான் இருந்தாலும் சர்கார் குழுவினருக்கு கொஞ்சம் தைரியம் அதிகம் தான் என்றே சொல்லலாம்.