”பீட்டர் பீட்டு ஏத்து” - உங்க டேன்ஸ் வீடியோவை போஸ்ட் பண்ணுங்க; சர்வம் தாளமையம் சேலஞ்ச்!

ராஜீவ் மேனன் இயக்கத்தில் ஜி.வி.பிரகாஷ் நடிப்பில் உருவாகி வரும் திரைப்படம் ‘சர்வம் தாளமையம்’. இதில் அபர்ணா பாலமுரளி, நெடுமுடி வேணு, வினீத், திவ்யதர்ஷினி உள்ளிட்டோர் நடித்துள்ளனர். இந்தப் படத்திற்கு ஏ.ஆர்.ரகுமான் இசையமைத்துள்ளார்.

இதன் படப்பிடிப்பு முடிந்து, இறுதிக்கட்டப் பணிகள் நடைபெற்று வருகின்றன. ரவியாதவ் ஒளிப்பதிவு செய்ய, அந்தோணி படத்தொகுப்பு செய்துள்ளார். கடந்த மாதம் 23ஆம் தேதி ‘சர்வம் தாளமையம்’ படத்தின் டீசர் வெளியாகி ரசிகர்களை மகிழ்ச்சியில் ஆழ்த்தியுள்ளது.

இதனை வெகுவாக கொண்டாடினர். வரும் டிசம்பர் 28ஆம் தேதி இப்படம் திரைக்கு வரும் என்று தெரிவிக்கப்பட்டுள்ளது. இதில் இடம்பெற்றுள்ள இரு பாடல்கள் ஏற்கனவே வெளியாகின. இந்த சூழலில் ’பீட்டர் பீட்டு ஏத்து’ என்ற பாடலை படக்குழு சமீபத்தில் வெளியிட்டது.

இதில் விஜய் ரசிகராக ஜி.வி.பிரகாஷ் நடித்துள்ளார். இதனால் விஜய் ரசிகர்கள் மிகுந்த உற்சாகத்தில் இருக்கின்றனர். இந்நிலையில் ’பீட்டர் பீட்டு ஏத்து’ என்ற சேலஞ்சை படக்குழு அறிமுகம் செய்துள்ளது.

இதற்காக ‘பீட்டர் பீட்டு ஏத்து’ பாடலுக்கு நண்பர்களுடன் நடனமாடி, அந்த வீடியோவை @mindscreencine என்ற பக்கத்திற்கு டேக் செய்து, டுவிட்டரில் பதிவிட வேண்டும். அதில் 3 நண்பர்களின் டுவிட்டர் கணக்குகளையும் டேக் செய்ய வேண்டும் என்று கேட்டுக் கொள்ளப்பட்டுள்ளது.

இதற்கு நிச்சயம் பெரிய பரிசு காத்திருக்கிறது என்பது மட்டும் விளங்குகிறது. அது என்ன என்பதைப் பொறுத்திருந்து தான் பார்க்க வேண்டும்.