நடிகர்களின் வாரிசுகள் இணைந்து நடித்த படம் ‘ஸ்கூல் கேம்பஸ்’!

தமிழ் சினிமாவில் ஆங்கிலப் படத்துக்கு நிகராக துப்பறியும் ஜேம்ஸ்பாண்ட் கேரக்டரில் நடித்து புகழ்பெற்றவர் நடிகர் ஜெய்சங்கர். அதேபோல் காமெடியில் சிறந்து விளங்கியவர் நாகேஷ். ஜெய்சங்கரின் அண்ணன் மகன் ராஜ்கமலும், நாகேஷின் பேரன் கஜேஷ் நாகேஷும் இணைந்து ‘ஸ்கூல் கேம்பஸ்’ என்ற படத்தில் நடித்து வருகின்றனர். இந்தப் படத்திற்கு கதை எழுதி, தயாரித்து முக்கிய வேடத்தில் நடித்து படத்தை இயக்குகிறார் ஆர்.ஜே. ராமநாராயணா.

இந்தப் படத்தின் ஆடியோ வெளியீடு சமீபத்தில் நடந்தது. இந்த விழாவில் பேசிய இயக்குனர் கூறும்போது, ‘‘இன்றைய நடைமுறை கல்வியில் உள்ள பல்வேறு பாடத்திட்டத்தினால் மாணவர்கள் சந்திக்கும் பல்வேறு பிரச்னைகள் என்ன? அதனால் மாணவர்களுக்கும் பெற்றோர்களுக்கும் ஏற்படும் மனஉளைச்சல் எவ்வாறு அவர்களை பாதிக்கிறது என்பதுடன் நாளைய கல்வி திட்டம் எப்படி மாற்றி அமைக்கப்பட வேண்டும் என்பதையும் அலசி தீர்வுக்கு வழி சொல்லும் கதையாக இது அமைக்கப்பட்டிருக்கிறது.

ராஜ்கமல், கஜேஷ் நாகேஷ் கதாநாயகர்களாக நடிக்கின்றனர். டெல்லிகணேஷ், மதன் பாபு ஆகியோருடன் முக்கியவேடமொன்றில் நானும் நடிக்கிறேன். இந்தப் படத்திற்கு தேவா இசையமைத்துள்ளார்’’ என்றார்.