மூன்று மொழிகளில் ஷாம் தயாரிக்கும் ‘காவியன்’!

நடிகர் ஷாம் சொந்தமாக மூன்று மொழிகளில் ‘காவியன்’ என்ற படத்தை தயாரிக்கவிருக்கிறார்.
தமிழில் நடிகர் ஷாம் ‘12பி’ படம் மூலம் அறிமுகமானார். அதன்பின் அடுத்தடுத்து பல படங்களில் நடித்தார். சில படங்கள் வெற்றி பெற்றன. தற்போது அவருக்கு தமிழில் போதிய வரவேற்பு இல்லாததால் தெலுங்கு, கன்னட மொழி படங்களில் நடித்து வருகிறார்.
தன் நடிப்பு திறமைக்கேற்ற சரியான வாய்ப்புகள் கிடைக்கவில்லை என்று கருதிய ஷாம் தானே சொந்தமாக ‘6’ என்ற படத்தை தயாரித்தார். அந்தப் படம் வணிக ரீதியாக வெற்றிபெறவில்லை. இந்த நிலையில் தற்போது மீண்டும் ஒரு சொந்தப் படம் தயாரிக்க முடிவு செய்துள்ளார். அதுவும் மூன்று மொழிகளில் தயாரிக்கவுள்ளார்.
இதுபற்றி அவர் கூறுகையில், ‘‘நான் தமிழில் கடைசியாக நடித்த படம் ‘புறம்போக்கு’. அந்தப் படத்தில் எனக்கு நல்ல பெயர் கிடைத்தது. இப்போதும் என்னை யாராவது எங்கு பார்த்தாலும் ‘6’ படம் பற்றிப் பேசும்போது எனக்கு மகிழ்ச்சியாகவும் ஆச்சரியமாகவும் இருக்கிறது. அந்த அளவுக்கு அது எல்லோரையும் பாதித்துள்ளது.
‘புறம்போக்கு’ படத்துக்குப் பிறகு ‘ஒரு மெல்லிய கோடு’ என்ற படத்தில் நடித்து முடித்தேன். பிறகு கன்னடம் தெலுங்கு என்று போய் விட்டேன். ஒரு மெல்லிய கோடு படம் கன்னடத்தில் ‘கேம்’ என்கிற பெயரில் உருவானது. அங்கே பிப்ரவரி 26-ம் தேதி வெளியானது. இந்தப் படம் வெற்றிகரமாக ஓடிக் கொண்டிருக்கிறது. இப்போது தமிழில் என் தயாரிப்பில் ‘காவியன்’ என்ற படத்தை எடுக்க இருக்கிறோம். படப்பிடிப்பு முழுக்க முழுக்க வெளிநாட்டில்தான் நடைபெறப்போகிறது. அப்படித்தான் கதை அமைந்திருக்கிறது. படத்தை சாரதி என்பவர் இயக்குகிறார். இதை மூன்று மொழிகளில் எடுக்க திட்டமிட்டிருக்கிறோம்’’ என்றார்.